Миҙгел сирҙәре арта

Башҡортостанда эсәк инфекцияһы сирҙәре менән ауырығандар арта. Был турала бөгөн Хөкүмәттә үткән оператив кәңәшмәлә “Роспотребнадзор”ҙың төбәк идаралығы етәксеһе Анна Казак һөйләне. Бер аҙна эсендә 175 кеше сирләгән, уларҙың 70 проценты – балалар.

Анна Казак белдереүенсә, күрһәткестәр норма сиктәрендә. Ошо миҙгелдә был сирҙәр йыл һайын артыусан.

Аҙна эсендә 12 кеше геморрагик биҙгәк менән сирләп киткән. 143271 киҫкен респиратор сир осрағы теркәлгән. Уларҙың яртыһы - балалар. Алдағы аҙна менән сағыштырғанда үҫеш 9,1 процент тәшкил иткән. Ә үткән йыл менән сағыштырғанда 13 процентҡа кәмерәк.

Коронавирусҡа килгәндә, 30 йәштән 49 йәшкә тиклемгеләр араһында сирләүселәрҙең артыуы күҙәтелә. Был кешеләрҙең ял ваҡытында зарарланыуына бәйле. Сит илдән 71215 кеше ҡайтҡан, уларҙың 960-ында коронавирус табылған. Уларҙың береһе лә коронавирустан прививка яһатмаған.

– Йәйге ял алдынан кешеләр менән әүҙемерәк эшләргә кәрәк, был коронавирустан вакцина яһатыуға бәйле.

Талпандарға килгәндә, аҙна эсендә дүрт мең кеше талпан ҡаҙалып мөрәжәғәт иткән. Был былтырғы ошо ваҡыт менән сағыштырғанда 26 процентҡа күберәк. Зарарланыу коэффициенты 0,7 процент тәшкил итә. Талпандарҙың 19,7 проценты боррелиоз йөрөтә. Һөҙөмтәлә бер кеше – талпан энцефалеты, икәү боррелиоз менән зарарланған. Парктарҙы талпандарҙан эшкәртеү дауам итә.

Фото: Яндекс.Дзен