Ковид госпиталдәрендә нисә кеше дауалана?

Бөгөн Хөкүмәттә үткән оператив кәңәшмәлә вице-премьер – һаулыҡ һаҡлау министры Максим Забелин коронавирусҡа бәйле һуңғы яңылыҡтар менән таныштырҙы.

Һуңғы тәүлектә был сирҙе 91 кеше йоҡторған. Шулай итеп, дөйөм сирләгәндәр һаны 38834-кә етте. Һуңғы тәүлектә бер кеше үлгән, унауҙың хәле ауыр. Бөтәһе 36795 пациент сирҙе еңгән.

Максим Забелин белдереүенсә, әлеге ваҡытта республиканың ике ковид госпиталендә 400-ҙән ашыу кеше дауалана.

– Зубовола - 290, Стәрлетамаҡта 158 кеше ята. Был аҙнала ковид-сирлеләр өсөн урындар һанын 10 процентҡа кәметергә йыйынабыҙ. Урындарҙы бөтөрөү тураһында һүҙ бармай – алда беҙҙе ҙур саралар көтә. Күп кеше ҡатнашасаҡ Фольклориада ла, “Ворлдскиллс” чемпионаты ла бар. Дөйөм алғанда, республика дауаханаларында һәм госпиталдәрендә запас урындар етәрлек, – тине ул.

Коронавирустан вакцинациялауға килгәндә, уны тулыһынса 295 мең кеше тамамлаған. Улар прививканың ике компонентын да һалдырған.

Министр белдереүенсә, вакцинациялау тиҙлеге бер ни тиклем артҡан, шул уҡ ваҡытта запас та бар. Был аҙнала республикаға йәнә 20 мең вакцина килеүе көтөлә.

– 7 июнгә ҡарата беҙгә 428 мең доза вакцина килгән. Уның беренсе компонентын 385 мең кеше һалдырған. Был - алынған прививкаларҙың 89 проценты. 295 мең кеше вакцинациялауҙы тамамлаған, – тине ул.

Фото: "Бәйләнештә".