Балалар араһында сирләүселәр арта

Республика буйынса Роспотребнадзор етәксеһе Анна Казак бөгөн үткән махсус брифингта “Спутник V” вакцинаһы бөгөн билдәле булған барлыҡ коронавирус штамдарынан да һаҡлай, тип белдерҙе.

– Вирустарҙың мутацияһы – тәбиғи күренеш. Пандемия башланғанда коронавирус бик ауыр кисерелә ине, үлемесле осраҡтар күп булды. Хәҙер иһә ул тиҙ йоға, башҡа билдәләре лә барлыҡҡа килә. Вакцинация – бәләнән һаҡланыуҙың төп ысулы. Мин барығыҙға ла кисекмәҫтән прививка яһатырға кәңәш итәм, – тине ул.

– Беҙҙә хәл тотороҡло – вакцина яһатыу өсөн уңайлы ваҡыт. Унан тыш сирҙең клиник картинаһы ла үҙгәрҙе: бығаса коронавирус йүтәлдән башланһа, әле эсәк-ашҡаҙан сирҙәре билдәләре йышыраҡ осрай. Вакцина яһатҡандан һуң температура күтәрелеүгә килгәндә, ул өс көн булған осраҡта ла – ҡәҙимге күренеш, иммун системаһының дөрөҫ реакцияһы, – тине ректор.

Белгестәр был осраҡта температураны парацетамол менән түбәнәйтергә, күберәк шыйыҡса эсергә, өйҙә булып торорға, алкоголь ҡулланмаҫҡа кәңәш итте. Температура биш көнгә яҡын төшмәһә, хәл насарайғанда табип саҡыртырға кәрәк. Прививка яһатҡан пациенттарҙың 95-97 процентында иһә бер ниндәй ҙә кире эҙемтәләр күҙәтелмәгән.

Һаулыҡ һаҡлау министры Максим Забелин иһә әлегә балалар өсөн вакцина булмауын, әммә сентябрҙә уның барлыҡҡа килеү ихтималлығын билдәләне (был йәһәттән эштәр алып барыла). Унан тыш ауырлы һәм ауырға ҡалырға планлаштырған ҡатындар өсөн дә коронавирусҡа ҡаршы вакцинанға һынауҙар барғаны әйтеп үтелде. Тәүге һөҙөмтәләр ҙә билдәле: препараттың балаға һәм буласаҡ әсәгә насар йоғонтоһо теркәлмәгән.

“Рәсми һөҙөмтәләрҙе көтәбеҙ”, – тине министр был мәсьәлә буйынса.

Бынан алда илдә һәм Башҡортостанда 14 йәшкә тиклемге балаларҙа коронавирус сирен йоҡтороу осраҡтары артыуы хаҡында хәбәр ителгәйне. Унан тыш, тотош донъяла коронавирус менән сирләүҙең клиник картинаһы етди үҙгәрештәр кисерә.

Фото: dw.com