“Мәктәпкә бик барғым килгәйне...”

Коронавирус инфекцияһын йоҡторғандар араһында балалар арта, тип хәүефләнә табиптар. Айырыуса 15 йәштән өлкәнерәктәр күп. Ковид йәшәрә... Әле 221 балаға ошо диагноз ҡуйылған. Медицина хеҙмәткәрҙәре көнө-төнө йүтәлләгән, тын алыуы ауырлашҡан кескәй пациенттар эргәһенән китмәй. Балаларҙы инфекциянан вакцинация ғына һаҡлай ала, тиҙәр.

– Минең мәктәпкә бик барғым килгәйне, – ти 11 йәшлек Әминә. – Ауырып китеү арҡаһында дауаханаға эләктем...

Уның кеүек 1 сентябрҙә тиҫтерҙәре менән бергә мәктәпкә аяҡ баҫа алмаған балаларҙың республикала байтаҡ икәнлеге билдәле.

Хроник сирҙәре булған пациенттар ковидты ауыр үткәрә, ти табиптар. Ундайҙарҙы 18-се дауахананың махсус бүлексәһенә килтерәләр. Кемдә – хирургик патология, кемдә – йөрәк сире, баш мейеһе ауырыуы... 54 йәшлек Фәйрүзә А. яңыраҡ инсульт үткәргән, өҫтәүенә коронавирус эләктергән, шуға күрә бында килтергәндәр. Йоғошло ауырыуҙар бүлексәһендә 400-ҙән ашыу сирле дауалана, һуңғы өс көндә генә 117 кешене ҡабул иткәндәр. Күбеһе ауыр хәлдә.

Бөгөнгө эпидемиологик хәл шатландырмай. Һуңғы тәүлектә республикала сирлеләр һаны йәнә 301-гә артҡан. 15 ауырыу вафат булған. Вирус ҡорбандары һаны 1145-кә етте. Һуңғы тәүлектә 89 ауырыу һауыҡҡан.

Ҡатмарлы сирҙән бары прививка ғына ҡурсалай ала, быны вакцина ҡаҙатҡан 1015426 кеше яҡшы аңлай. Ҡалғандар ҙа үҙҙәрен хәүеф аҫтына ҡуймаһын ине.

Фото: Һаулыҡ һаҡлау министрлығы.