Һәр кем донор була алмай

Өфөләге Ҡан ҡойоу станцияһында бер төркөм кешегә Рәсәйҙең почетлы  доноры  танытмаһы  һәм күкрәккә тағыла торған билдә  тапшырылды.  Республикабыҙҙа 11 меңдән ашыу Почетлы донор иҫәпләнә. Ҡан ҡойоу станцияһында һәм уның филиалдарында йылына 60 меңдән ашыу донация үткәрелә.

 Һәр кем донор була алмай. Йоғошло сирҙәр, 18 йәштән кесе, ә тән ауырлығы 50 килограмдан кәм булыу – донорлыҡҡа   ҡаршы күрһәткестәр. Татуировка яһатылыуына дүрт айҙан кәмерәк  ваҡыт  үткән осраҡта  ла  ҡан биреүгә яҡын юлатмаясаҡтар. Ҡырҡ тапҡырҙан күберәк ҡан биргәндәр “Рәсәй Федерацияһының почетлы доноры” тигән маҡтаулы  исемгә лайыҡ була.

– Шундай хәлдәр була: заманса супер ҡорамалдар, дарыуҙар  етерлек, әммә донор ҡанынан тыш кеше ғүмерен ҡотҡарыуы мөмкин түгел,– ти станцияның баш табибы Рәмил Хәмитов. – Беҙ быйыл танытмаларҙы тантаналы шарттарҙа тапшырырға булдыҡ. Донор бит ул бик баҫалҡы кеше, ғүмерҙәрҙе һаҡлап ҡалыу өсөн бөтә күңелен, ҡанын  бирә, тик алмашҡа бер ни талап итмәй.

Байрамды үткәреүгә ирекмәндәр, табиптар ярҙам итте. Станция хеҙмәткәрҙәре  ҡунаҡтар менән  берлектә бөгөн дә ҡан тапшырҙы.  Донорҙар өсөн медицина учреждениеһы  буйлап экскурсия үткәрелде.

Фото: БР Һаулыҡ һаҡлау министрлығы.