“Ҡыҙыл зона”ла һәр минут ҡиммәт

Стәрлетамаҡ ковид госпиталенә көн дә 70-кә яҡын ауырыу килтерелә. Коридорҙа ятҡан пациенттар ҙа бар. Дауахана һаман да көсөргәнешле эшләй. “Ҡыҙыл зона” табиптары – тын алғыһыҙ махсус костюмдарҙа. Ҙур быяла күҙлектәре ныҡ тирләп йонсота. Ә сменаһына алтышар сәғәт эшләргә кәрәк, тиҙәр. BashNews хәбәрселәре госпиталдә күргән тәьҫораттары менән уртаҡлашты.

Үткән аҙнала госпиталгә килтерелгән Диана Б., вакцина яһатыуға ҡара­маҫ­тан, ауырып китеүе тура­һында һөйләне. ПЦР-тест сир барлығын асыҡламаһа ла, компьютер томогра­фияһы үпкәнең 40 проценты зарарланғанын күрһәт­кән. Диагнозы – ике яҡлы пневмония.

– Мин тын ала алмай баш­лағайным инде, йөрөп булмай. Ковид билдәләре булыуын аңланым. Поли­к­линикаға барҙым, шунда уҡ госпиталгә оҙаттылар, – ти ул.

Бындай пациенттар госпиталдә 300-ҙән ашыу. Бында йышыраҡ 45 йәш­тән өлкәнерәктәр эләгә. Дауаланғандарҙың 98 проценты вакцина ҡаҙатмаған. Нилектән, ҡайҙа вирусты йоҡторалар һуң?

Табиптар әйтеүенсә, ауырыуҙарҙың күбеһе, ҡунаҡҡа йөрөп, алыҫтан  тыуған йорттарына ҡайт­ҡан балалары, туғандары менән аралашып сирләп китә. Көнөнә 10-15 урын бушаһа, шул көндә үк уны яңы пациенттар биләй.

Үҙәктең икенсе бүлек­сәһе мөдире Лилиә Вә­лиева әйтеүенсә, бында алты меңдән ашыу пациент һауыҡтырылған.

Үҙәк бер нисә корпустан тора. Лаборатор-диагнос­тика бүлексәһе өс зонаға бүленгән. Тәүлек әйләнә­һенә эшләгән экспресс-лаборатория ла, кислород станцияһы ла бар. Һәр палатаға кислород килеүен тәьмин иткәндәр. Пациент­тарҙың “икенсе һулышы” асылыуына, ҡорамал­дар­ҙан тыш, медицина хеҙ­мәткәрҙәренең тырыш­лығы, иғтибарлылығы булышлыҡ итә.

–Тән температураһы төшмәй аптыратты. Бик ҡаты ауырыным. Һөйлә­шерлек тә хәлдә түгел инем, – ти Дамира Ә. – Шәф­ҡәт туташтарына, сани­таркаларға ҙур рәхмәт!

Кешеләрҙең ғүмерен һаҡ­лау өсөн бында бөтә мөм­кинлектәр фай­ҙа­ла­ныла. Госпиталь хатта көтөлмәгән хәл-ваҡиға­ларға ла әҙер. Мәҫәлән, коронавирустан дауа­ланған йөклө ҡатындар өсөн бала табыуҙа ашы­ғыс медицина ярҙамы күрһәтеү өсөн бала табыу блогы әҙер тора.

– Тәүҙә бик ауыр булды, ҡайһы саҡта илашып та ала инек. Аҙаҡ барыһына ла күнегәһең, хатта уңай­һыҙ костюмда эшлә­гә­нең­де лә тоймай баш­лайһың. Беҙҙең өсөн әлегә ял көнө лә, байрам да юҡ, – ти табип Эльза Фәтҡуллина.

“Ҡыҙыл зона”ла һәр минут ҡиммәт. Биләмәлә медицина хеҙмәткәрҙәре өсөн ятаҡ ойошторолоуы бик уңайлы, арып ҡайтҡан табиптар өсөн бөтә уңай­лыҡтар булдырылған. Иртәгә йәнә кеше ғүмер­ҙәре өсөн көсөргәнешле көрәш башланасаҡ, ба­тырҙарға ла ял кәрәк...