Балалар һәм өлкәндәр сирләй

Башҡортостанда коронавирусҡа бәйле хәл һаман көсөргәнешле булып ҡала. Бөгөн Хөкүмәттәге оператив кәңәшмәлә “Роспотребнадзор” идаралығы етәксеһе Анна Казак "сирҙең дүртенсе тулҡыны етеп килә" тине. Быға кешеләрҙең әүҙем миграцияһы булышлыҡ итә – өлкәндәр йәйге ялдан һуң эшкә сыға, балалар каникулдан һуң мәктәптәргә, балалар баҡсаларына бара.

“Әле 14 йәшкә тиклемге балалар һәм 65 йәштән өлкәндәр сирләй. Улар башлыса – белем биреү учреждениелары тәрбиәләнеүселәре һәм уҡыусылары", – тине ул.

Анна Казак белдереүенсә, “Роспотребнадзор” белгестәре белем биреү учреждениеларына барып, ковидҡа ҡаршы сараларҙың үтәлешен тикшерә.

“Сирҙәр структураһына килгәндә, дауахананан тыш пневмония күбәйә башланы. ОРВИ менән ауырыу осраҡтары ла арта. Тәбиғи көҙгө эпидемиологик күтәрелеш бара, һәм был хәүеф тыуҙыра. Эпидемиологик сик 106 процентҡа еткән, үткән аҙна менән сағыштырғанда, 28 процентҡа үҫеш күҙәтелә. Шуға күрә киҙеүҙән вакцина яһатыу эшен әүҙемләштерергә кәрәк", – тине ведомство етәксеһе.

Радий Хәбиров мәғариф министрлығына мәктәптәр менән эште көсәйтергә һәм белем биреү учреждениелары эшмәкәрлеге буйынса тәҡдимдәр әҙерләргә ҡушты.

Фото: volg.mk.ru