“Юҡ” тип әйтергә лә өйрәнергә кәрәк

Тормошта уңышлы, сәләмәт, һәр үткән көндән ҡәнәғәт булыу өсөн белемле, лайыҡлы хеҙмәт хаҡы алыу, ғаиләле булыу ғына етмәй, ти психологтар.

Кеше күңелен, кисерештәрен өйрәнгән, көн дә ошо проблемалар эсендә ҡайнаған белгестәр ни өсөн йәшәү көсөн юғалта ба­рыуыбыҙҙың, ҡәнәғәтһеҙлек той­ғоларының тынғы бирмәү сәбәп­тәрен бына ниҙә күрә, танышығыҙ!

Уларҙың фекеренсә, беҙ “юҡ” тип әйтергә теләгән ерҙә йыш ҡына “эйе” тип әйтеп яңылыша­быҙ, ял итмәйбеҙ, үҙебеҙҙең яратҡан эш менән шөғөлләнмәй­беҙ... Хатта күңелебеҙгә ятмаған, бер яҡтан да ҡыҙыҡһыныу тыу­ҙырмаған кешеләр менән ара­лашыуыбыҙҙы дауам итәбеҙ. Гел генә тормошонан ҡәнәғәт булмайынса, туҡ­тауһыҙ зарланған, донъяны ҡара төҫтәрҙә генә күргән таныштарҙан айырыла алмай йонсойбоҙ.

Ҡасан, ниндәй шарттарҙа кү­ңелде үҫтереп, кәйефте күтәреп, йәшәүгә ынтылышты арттырып була? Белгестәрҙең кәңәшенә ҡолаҡ һалайыҡ, бәлки, береһе генә булһа ла тормошоғоҙҙо яҡшы яҡҡа үҙгәртергә ярҙам итер.

Яңы таныштар табығыҙ, яңы белем үҙләштерегеҙ, үҙгәрештәр алдындағы ҡурҡыу тойғоһонан ҡотолоғоҙ, ижад итегеҙ, һеҙгә ярҙам ҡулы һуҙырға әҙер торған һәм ышаныслы кешеләр менән аралашығыҙ, тип кәңәш итә психологтар. Бассейнға, мунсаға барыу, тышта йөрөү (магазинға йәки эшкә йүгереү менән бутамағыҙ), күңелегеҙ ҡушҡан эш менән шөғөлләнеү йөрәгегеҙгә ял, тәне­геҙгә көс бирәсәк, тип иҫәпләй белгестәр.

Ҡыҫҡаһы, иңегеҙгә башҡалар­ҙың ҡулдан килмәҫлек проблемаларын алмаҫҡа тыры­шығыҙ, сөнки бының менән ике яҡҡа ла зарар килтереүегеҙ ихтимал.

- Динә АРЫҪЛАНОВА