Бишенсе тулҡындың булыуы ла ихтимал

“Башинформ”да үткән бөгөнгө брифингта һаулыҡ һаҡлау министры Максим Забелин яңы коронавирус инфекцияһының бишенсе тулҡыны булыу мөмкинлеген дә йәшермәне.

“Инфекция һауа-тын алыу юлдары аша йоға. Әле эпидемиологик миҙгелдең башы ғына. Күҙаллауы ауыр, әлбиттә, әммә беҙ коллектив иммунитетты үҫтермәһәк, эпидемиологтар фекеренсә, киләһе бишенсе тулҡынды 2022 йылдың ғинуар-февраль айҙарында ҡаршылауыбыҙ ихтимал,– тине министр. - Халыҡтың 80 процентын прививкалай алмаһаҡ, эпидемиологик хәл тотороҡланмаясаҡ”.

Ғәҙәттәге тормошҡа ҡасан ҡайтырбыҙ? Бар кешене ҡыҙыҡһындырған һорауға Максим Забелиндың яуабы ҡыҫҡа һәм аңлайышлы булды: “Ғәҙәттәге тормошҡа ҡайтыуҙың иң тиҙ варианты – вакцина яһатыу. Әгәр коллектив иммунитетҡа өлгәшмәһәк, коронавирус инфекцияһы һөҙөмтәһендәге сикләүҙәр тағы ла оҙаҡҡа һуҙыласаҡ. Эпидемиологик хәлгә ярашлы, уларҙың тағы ла ҡатыланыуы мөмкин. Бөтәһе лә үҙебеҙҙең ҡулда”.

Фото: ”Башинформ”.