Радий Хәбиров: "Хәл ҡатмарлы, быны йәшермәйем"

Һуңғы тәүлектә Башҡортостанда коронавирус инфекцияһы 488 кешелә асыҡланған. Дөйөм сирлеләр һаны 68797 кешегә еткән. Был турала бөгөн Хөкүмәттә үткән оператив кәңәшмәлә вице-премьер – һаулыҡ һаҡлау министры Максим Забелин һөйләне.

Күренеүенсә, республикала был сиргә бәйле хәл көсөргәнешле булып ҡала. Сирле кешеләрҙең 6639-ы амбулатор дауа ала, 846 кеше дауаханала ята. 44 пациенттың хәле ауыр тип баһалана, 17 кешене үпкәне яһалма елләтеү аппаратына тоташтырғандар.

Сирлеләрҙең 86 проценты һауыҡҡан, уларҙың 212-һе - һуңғы тәүлектә.

– Әле республикала сирлеләр өсөн 6550 урын булдырылған, уның 92 проценты биләнгән. Шул уҡ ваҡытта яңы сирлеләр өсөн урын етмәҫ тигән ҡурҡыныс юҡ, кәрәк булһа, беҙ барлыҡ район-ара үҙәктәрҙә госпиталдәр асырға әҙербеҙ, – тине Максим Забелин.

Башҡортостанда коронавирусҡа ҡаршы вакцина һалдырыу дауам итә. Әле республикаға 1 миллион 855 мең доза вакцина килтерелгән. Уның беренсе компонентын 1 295353 кеше, икенсеһен 1 188587 кеше һалдырған. Уларҙың 325254-е – 60 йәштән өлкән кешеләр.

Радий Хәбиров үткән аҙнала ковид госпиталенә барып нимә күргәне тураһында һөйләне.

– Беҙ үткән аҙнала Максим Васильевич менән ковид госпиталендә булдыҡ. Ундағы хәлдәрҙе үҙ күҙебеҙ менән күрге килә ине. Бер нимә лә йәшермәйбеҙ: сирлеләр бик күп, күптәр коридорҙа ята. Табиптар бик ауыр хәлдә. Мин улар менән аралаштым – күптәр ошондай режимда бер йыл эшләй, – тине ул.

Радий Фәрит улы белдереүенсә, әле хәлдәр ысынлап ҡатмарлы. Пандемияны еңеүҙең берҙән-бер юлы – вакцинация. Шуға күрә хәҙер төп бурыс: әле прививка яһатмаған кешеләр араһында аңлатыу эше алып барырға.

Шулай уҡ Радий Хәбиров Хөкүмәткә һәм Финанс министрлығына һаулыҡ һаҡлау блогы һорауҙарына шунда уҡ яуап бирергә һәм кәрәкле саралар бүлергә ҡушты.

Фото: gorobzor.ru