Ҡандың ҡуйырыуы хәүефле

Ҡандың ҡуйырыуы арҡаһында эске ағзаларҙың  кислородҡа мохтажлығы арта, тромб­тар барлыҡҡа килеүе ихтимал. Ҡан тамырҙар буйлап иркен йөрөһөн өсөн тәжрибәле табиптар ябай ғына кәңәштәр тәҡдим итә.

Күберәк һыу эсегеҙ, хәҙер кешеләр һыу урынына төрлө газлы эсемлек, һут эсергә әүәҫ. Өлкән кеше тәүлегенә 2-2,5 литр һыу эсергә тейеш. Балаларығыҙҙы ла өйрәтегеҙ. Тәбиғи һыу– тромб барлыҡҡа килеүен иҫкәрткән иң яҡшы сара.

Ҡанды шыйығайтыу өсөн түбәндәге аҙыҡтарҙы файҙа­ла­ныр­ға мөмкин: зәйтүн һәм етен май­ҙары, алма һеркәһе, һарымһаҡ һәм һуған, лимон, көнбағыш орлоҡтары, сөгөл­дөр, какао, балыҡ һәм балыҡ майы, томат, һоло бутҡа­һы, ҡурай еләге, сейә, ер еләге, имбир. Ошо аҙыҡ-түлектең бер нисәһе көндәлек рационда булырға тейеш, тип кәңәш итә белгестәр.

Ҡандың ҡуйырыуына сә­бәп­се аҙыҡтарҙы ла һанап үтәйек: итле һурпа, колбаса, ыҫланған ризыҡ­тар, аҡ икмәк, гөлйемеш, ҡара миләш, банан, манго һәм күп кенә дарыу үләндәре ( шуға күрә табиптар файҙалы тип һаналған үлән­дәрҙе даими эсергә ҡушмай, бары курс менән тәҡдим итә). Шулай уҡ ҡан ҡуйырмаһын өсөн тоҙҙо самалап ҡулланыу, алкоголле эсемлектәр менән мауыҡмау, тәмәкенән ваз кисеү яҡшы буласаҡ.

Хәрәкәттә – бәрәкәт! Йәйәү йөрөгөҙ, физкультура менән шөғөл­ләнегеҙ. Ошо ябай ғына ҡағиҙә­ләрҙе үтәү ҙә беҙҙе күп бәләнән йолоп ҡалыуы ихтимал.

Ҡандың ҡуйылығы уның ба­лауыҙ һымаҡ йәбешкәк булыуы хаҡында һөйләй. Йә­бе­шеүсәнлек күтәрелеүенә күп шарттар йоғонто яһай: тамыр­ҙарҙың зарарланыуы, бауыр функцияһының боҙо­лоуы, ҡан составы үҙгәреүе һәм башҡа күп төрлө үҙгәреш­тәр.

Хәҙер ҡандың ҡуйылығын кәметеү өсөн препараттар ҙа етерлек, бары медицина анализдары нигеҙендә табиптар менән кәңә­шлә­шергә кәрәк.

-  Динә АРЫҪЛАНОВА