Яман шештән дә хәтәрерәк булып сыға...

“Мин быйыл бик яҡын, ҡәҙерле кешеләремде юғалттым. 72 һәм 74 йәшлек өләсәйҙәрем хәҙер яҡты донъяла юҡ инде. Барыһына ла ковид сәбәпсе.  Береһе Өфөләге 21-се дауаханала, икенсеһе 8-се дауаханала вафат булды,” - тип яҙа ейәнсәрҙәре Ксения.

Өләсәйҙәрҙең береһе, Галина исемлеһе, июль айында  ҡаты сирләп китә. Хәле көндән-көн насарлана, дүрт көн буйына тән температураһы 37,5 градустан төшмәй. Дежур табип ни бары өсөнсө көнгә генә килеп етә, әбейҙең торорлоҡ та хәле ҡалмаған була.

“Поликлиникаға шылтыратып булмай, телефонды  алмайҙар. Хәле ҡырҡа насарланғас, "Ашығыс ярҙам" саҡырттыҡ, шунда уҡ инфаркт булыу шиге менән 8-се дауаханаға алып киттеләр. Инфарктты раҫлай алманылар, ниндәйҙер һүрәттәр булмауына һылтандылар.  Бер тәүлек реанимацияла ятҡырҙылар ҙа палатаға сығарҙылар. Тейешле ярҙам булманы,” - ти Ксения.

Өләсәһе вакцина яһатмаған, сөнки ул  яман шештән иң аҙаҡҡы химия терапияһы курсын  алырға, тамам сирҙән ҡотолоп, аяҡҡа баҫырға ниәтләнгән була. ”Ул яман шеште еңде, тик был мәкерле сирҙе еңә алманы. Инфаркт кисергән, ете курс химия терапияһын алған пациентҡа ҙур иғтибар  кәрәк ине. Уның үлеме тураһындағы ауыр хәбәрҙе лә дауахана хеҙмәткәрҙәренән түгел, ә ерләү хеҙмәтенән ишеттек,” – ти ҡыҙ.

Ксенияның икенсе өләсәһе дауаханала ике аҙнаға яҡын дауалана. Уның хроник сирҙәре күп була, шуға күрә лә вакцина яһатмаған. “Сир аяуһыҙ, иң ауыры шул: һин бер нисек тә ҡәҙерле кешеңә ярҙам итә алмайһың, бары өҙгөләнәһең, ҡайғыраһың, үҙеңде ғәйепле һиҙәһең,” - тип тамамлай һүҙен ҡыҙ.

Өлкәндәр үҙҙәрен һаҡларға тырышып, вакцина яһатҡанда,  һис һүҙһеҙ,  вирус ҡорбандары аҙыраҡ булыр ине. Был йәһәттән балаларының  оло быуынға ҡарата иғтибары, хәстәрләүе, аңлатыуы бик кәрәк/

Фото:realnoevremya.ru