Маҡсатҡа тиклем алыҫ әле

Республикала коронавирусҡа бәйле хәлдәр нисек? Уның тураһында бөгөн Хөкүмәттә үткән оператив кәңәшмәлә вице-премьер – һаулыҡ һаҡлау министры Максим Забелин һөйләне.

Бөгөнгә ҡарата Башҡортостанда был сир 77473 кешелә асыҡланған, һуңғы тәүлектә – 660. Уларҙың 67 меңдән ашыуы һауыҡҡан, һуңғы тәүлектә – 294.

– Әле 7138 кеше амбулатор шарттарҙа дауалана, 1062 кеше дауаханала ята. 52 пациенттың хәле ауыр тип баһалана, 16 кешене үпкәне яһалма елләтеү аппаратына тоташтырғандар. Дауаханаларҙа 8155 урын булдырылған, уларҙың 12 проценты буш, – тине Максим Забелин.

Вице-премьер белдереүенсә, Башҡортостанда коронавирус инфекцияһы менән һөҙөмтәле көрәшер өсөн 2 484 000 кешегә прививка яһатырға кәрәк. Бөгөнгә ҡарата вакцинаның беренсе компонентын 1 миллион 436 мең кеше, икенсеһен 1 миллион 260 мең кеше һалдырған. Бөтәһе 1 миллион 910 мең доза вакцина алынған.

Әле һуңғы аҙнала индерелгән сикләүҙәр сәбәпле вакцинация темптары йәнә артты. Максим Забелин белдереүенсә, 16 октябрҙә прививканы рекордлы кешеләр һаны яһатҡан – 40321.

Тик маҡсатҡа еткәнсе әле йыраҡ. Коллектив иммунитет булдырыу өсөн тағы 1 миллион кешегә прививка яһатырға кәрәк. Бында һәр кемдең аңлылығы һәм яуаплылығы булырға тейеш. 

Фото: inc-news.ru