Йәш әсәләргә прививка яһатырға рөхсәт ителде

Рәсәй Һаулыҡ һаҡлау министрлығы хәбәр итеүенсә, сабыйҙарын имеҙгән әсәләргә коронавирустан вакцина яһатыу өсөн ҡаршылыҡ юҡ, хәҙер уларғә прививка  эшләтергә рөхсәт бирелде.

Әлбиттә, ҡайһы берәүҙәргә ковидтан прививка яһатыуҙы кисектерергә тура киләсәк, мәҫәлән, вакцинаның ниндәй ҙә булһа компонентына һиҙгерлек көслө булғанда, анамнезда ауыр аллергик реакция теркәлгәндә, киҫкен йоғошло һәм башҡа сирҙәр күҙәтелгәндә вакцина яһатырға ярамай. Хроник сирҙәр киҫкенләшкәндә һауыҡҡандан һуң 2-4 аҙна үткәс  йәки ремиссия башланғас ҡына прививка яһатырға рөхсәт ителә. Киҫкен респиратор вируслы сирҙәр һәм  йоғошло ашҡаҙан-эсәк ауырыуҙарынан  һуң  вакцина яһатыу өсөн температураның булмауы мотлаҡ.

Әлегә прививка яһатыу 18 йәше тулғандарға ғына рөхсәт ителә.  Вакцинаның балалар өсөн тәьҫирлеге һәм хәүефһеҙлеге тураһында мәғлүмәт юҡ.  Шуны ла иҫкә төшөрәйек, коронавирустан һәм киҙеүҙән бер юлы прививка яһатырға рөхсәт бирелде. Һуңғы тикшеренеүҙәрҙән күренеүенсә, вакциналар бер-береһенең тәьҫирлеген кәметмәй, тигән һығымта яһалды.

Фото:tengrinews