Коронавирусты 18 минутта асыҡлайҙар...

Өфөләге 13-сө ҡала дауаханаһының клиник-диагностик үҙәгендә белгестәр махсус прибор ярҙамында 18 минут эсендә коронавирус булыу-булмауын асыҡлай. Был хаҡта лаборатория мөдире Светлана Музюкова аңлатма бирҙе.

Пациенттарҙың биоматериалы лабораторияға килтерелә.  Хеҙмәткәр тәүге бокста исемлектәрҙе эшкәрткәндән һуң  уларҙы тәҙрә аша икенсе боксҡа – “бысраҡ зона”ға тапшыра.  Табиптар  анализ биргән кешелә коронавирустың булыу-булмауын  белеү өсөн махсус ҡиммәтле прибор ярҙамында  вирусты бүлеп сығара.

“Беҙ яңы прибор – анализатор алдыҡ. Ул вирусты 18 минут эсендә бүлеп сығарырға һәләтле, элек быға сәғәт ярым ваҡыт китә ине. Анализаторға бер юлы  һынауға алынған 96  өлгө ҡуйыла,” – ти лаборатория мөдире.

 Өс бүлмә тәҙрәләр менән тоташтырылған. Өсөнсө боксҡа - “таҙа  зона”ға – шулай уҡ тәҙрә аша анализ өлгөләре тапшырыла. 1 сәғәт  20 минут дауамында улар анализаторҙа тора. Аҙаҡ табиптар уларҙы амплификаторға ҡуя, һөҙөмтәне алып, берҙәм “ПроМед”  системаһына тапшыра.  Кеше шунда уҡ смс-хәбәр алып, үҙендә коронавирус булыу-булмауын белә.  Лаборатория хеҙмәткәрҙәре өс сменала төн уртаһына тиклем эшләй. Анализ һөҙөмтәләре дүрт-алты сәғәт дауамында әҙерләнә, иң мөһиме, биоматериалдар лабораторияға тиҙ барып етергә тейеш.

Ксения Калинина фотоһы.