Сирҙән үлгәндәр кәмей башланы

Коронавирусҡа бәйле һуңғы һандар ниндәй? Улар тураһында Хөкүмәттәге оператив кәңәшмәлә вице-премьер – һаулыҡ һаҡлау министры Максим Забелин һөйләне.

Уның белдереүенсә, бөгөнгә ҡарата республикала 91518 кешелә ошо сир асыҡланған. Һуңғы тәүлектә – 663. Үлгән кешеләр һаны ла байтаҡ, 2851 кеше вирус ҡорбаны булды. Һуңғы тәүлектә 26 кеше вафат булған. Әйткәндәй, был йәһәттән әҙерәк ыңғай тенденция күҙәтелә. Сөнки, быға тиклем тәүлегенә 35-37 кеше үлгән осраҡтар ҙа булды.

– Әле 7300 кеше коронавирустан амбулатор шарттарҙа дауалана, 839 кеше дауаханала ята. Туғыҙ кешенең хәле ауыр тип баһалана, улар интенсив терапия бүлексәһендә ята. Йоғошло сирҙәр менән ауырығандар өсөн урындарҙың 18,9 проценты буш – был 1200 урын тирәһе, – тине Максим Забелин.

Пандемия башланғаны бирле сирҙе 80507 кеше еңгән, һуңғы тәүлектә – 644.

Ковидтан вакцинацияға килгәндә, прививканың беренсе компонентын 1736786 кеше, икенсеһен – 1405195 кеше һалдырған.

Радий Фәрит улы сираттағы тапҡыр шуға баҫым яһаны – был пандемияны еңеүҙең юлы бер – вакцинация. Шуға күрә урындарҙа хакимиәт башлыҡтарына был эште көсәйтергә ҡушылды. Радий Хәбиров кешеләрҙең "Спутник лайт" вакцинаһы булмауы тураһында әйтеүен билдәләне. Министр оҙаҡламай улар килтереләсәк тине.

Фото: Яндекс.Дзен