Матурлыҡ яман шешкә ҡаршы

Онкология сире менән ауырыған ҡатын-ҡыҙҙарҙы яҡлау буйынса ”Химия булды, әммә беҙ айырылыштыҡ” Бөтә Рәсәй проекты республиканың гүзәл зат­тарын фотосессияла ҡатнашырға саҡыра.

Проект, фототерапияны психологик ярҙам булараҡ файҙаланып, онкология сирле ҡатын-ҡыҙҙарҙы уңышлы дауалауҙы һәм реабилита­цияға булышлыҡ итеүҙе күҙ уңында тота. Кампанияның маҡсаты онкология диагнозы ҡуйылған кешеләрҙә ҡалып­тарҙы һындырыу һәм ҡур­ҡыуҙан арындырыуға, йәм­ғиәттә ауырыуҙарға ҡарата рәхимлек, миһырбанлыҡ той­ғоларын уятыуға йүнәлтелгән. Ваҡытында асыҡланған яман шеш сире уңышлы дауалана.

Проекттың беренсе сес­сияһы декабрь айында үткә­релә. Ҡатнашыу өсөн үҙең тураһында яҙманы проект сайтына ебәрергә кәрәк. Һау­лыҡ һаҡлау министры Максим Забелин әйтеүенсә, фотосессия онкология сиренә дусар кешеләрҙе социали­зациялауға мөһим өлөш индерәсәк, уларҙың психологик торошон яҡшыртасаҡ, дауаланырға дәртләндерәсәк. Ҡатын-ҡыҙҙар үҙҙәренең һау­лығына иғтибарлыраҡ бу­лырға өйрәнер, әлеге ва­ҡытта дауаланған аҫыл затта өмөт утын ҡабындырыр өсөн дә ярҙам итер, тигән ышаныс бар. “Моя фототерапия” сайтында ҡатын-ҡыҙҙар үҙҙәре­нең яҙмышына төшкән һы­нау­ҙарҙы үтеүе, дауаланыу саралары менән уртаҡлаша, кәңәшләшә ала.

Динә АРЫҪЛАНОВА