“Йөҙөңә ҡарап сиреңде әйтә алам...”

Кешенең йөҙөнә күҙ һалып та уның сәләмәтлегендәге проблемалар тураһында һүҙ йөрөтөргә мөмкин, тип иҫәпләй хирург-онколог Иван Карасев.

Мәҫәлән, йөҙҙөң төҫһөҙләнеп, ағарып китеүе анемияға ишаралай, ә һарғайыуы бауырҙың һау булмауы тураһында һөйләй. Ирендәрҙең күгәреүе йөрәк-ҡан тамырҙары сирҙәре хаҡында иҫкәртә. Тиренең ҡороуы – организмдың һыуһыҙланыуы йәки тир биҙҙәре эшмәкәрлегенең боҙолоу билдәһе.

Иғтибарлы булһағыҙ, хатта, бит симметрия­һының үҙгәреүенә ҡарап, инсульттың яҡынла­шыуын билдәләргә була, ти табип. Бит тиреһенең ваҡытынан алда һулыуы һәм сырышыуы матдәләр алмашыныу һәм ашҡаҙан-эсәк юлы сирҙәренә бәйле булыуы бар.

Битте сыбарлаған һытҡылар ҙа күп нәмә тураһында һөйләй. Мәҫәлән, маңлайҙағыһы – нәҙек эсәк, яңаҡтарҙағы һәм өҫкө ирендәгеһе – йыуан эсәк, сикәләгеһе – үт ҡыуығы, ҡатын-ҡыҙ эйәгендәгеһе енес системаһы ағзаларында ниндәйҙер проблема булыуын иҫкәртә, ти табип.

Динә АРЫҪЛАНОВА