Өлкәндәр әүҙемләште, пункттарҙың буш торғаны юҡ

Республиканың бөтә райондарында өлкәндәр өсөн махсус прививка пункттары  асылды. Уларҙың буш торғаны юҡ. Район һәм ҡала гәзиттәре хәбәрселәре быға үҙ күҙҙәре менән күреп ышанды.

Шишмә ҡасабаһындағы прививка пунктына көн һайын йөҙҙән ашыу кеше мөрәжәғәт итә.  8 декабргә ҡарата 80 кешенең икенсе компонентты алыуы, 30 кешенең ревакцинация өсөн килеүе билдәле.  Шуларҙың береһе – Марьяна һәм Рәфҡәт Авзаловтар ғаиләһе. Икеһенә лә 70 йәш, “быға тиклем дә прививканы яҡшы үткәрҙек, әле лә ҡыйын булманы,” ти улар.

 Благовещен үҙәк район дауаханаһында махсус пункт асылыу менән  медицина хеҙмәткәрҙәренә көн һайын тиҫтәләгән кешене ҡабул итергә тура килә. Тормош юлын ҡулға-ҡул тотоношоп үткән  76 йәшлек Лидия һәм Александр Алабужевтар бөгөн дә парлашып пунктҡа прививка яһатырға  килгән.

– Тәүге прививкаларҙы яҡшы үткәрҙек, икенсе тапҡырға тыныс күңел менән килдек. Балаларыбыҙ ҙа, ейәндәребеҙ ҙә вакцина ҡаҙатты,– ти өлкәндәр. – Махсус прививка пунктын асып, дөрөҫ эшләнеләр. Бик уңайлы, сират юҡ, персонал итәғәтле, бөтә һорауҙарға тулы яуап ҡайтаралар.

Баҡалы районының Мәҙәниәт йортонда  пенсионерҙар өсөн махсус прививка пункты йәйелдерелгән. Аҙна һайын килеүселәр араһында тонометрҙар отошо уҙғарыла. Хеҙмәт ветерандары Ринат Закиров, Ғәмилә Борханова, Клара Канарейкина  бик кәрәкле медицина приборын отоп ҡыуанған.

Фото:”Башинформ".