"Кейәүгә сыға алмайһың, балаң булмай, иртә үләһең..."

Беҙҙең йортобоҙҙағы күрше квартиранттар индерә. Был юлы унда  өс ҡыҙ йәшәй. Берәүһенең подъезд алдына сығып, йыш ҡына тәмәке тартҡанын күрәм, һаулыҡ һорашам.

 – Һеңлем, мин - экстрасенс. Һеҙ йәш кенә булһағыҙ ҙа, дошманығыҙ бар, унан һаҡ булығыҙ, – тинем дә китеп барҙым.

Икенсе тапҡыр ул мине үҙе туҡтатып:

– Минең дошманым кем, ҡайҙа икәнен дә әйтеп бирегеҙ әле, ағай, аҡсаһын түләйем, – тине.

– Дошманыңды әйтеп бирәм. Әммә уға мөнәсәбәтеңде белдермәй ҡалма. Унан үс алырға вәғәҙә бирһәң генә исемен әйтәм.

– Вәғәҙә бирәм, ағай, – тип ризалашты ул.

– Вәғәҙә биреп тә, үс алмаһаң, һин кейәүгә сыға алмайһың, балаң булмай. Иртә үләһең, – тинем.

– Ағай, үс алам, әйтегеҙ. Ә нисек үс алырға? – тип бик тә үтенеп һораны ул.

– Уны үлтерһәң, енәйәт була. Әммә һин уны тотоп ал да, ергә бәреп, иҙгеләп тапап кит. Артабан һинең ҡатылығыңды, үҙеңде һаҡлау көсөн аңлағас, ул һине онотор, кәмһетмәҫ, – тинем.

– Ярай, һеҙ әйткәнсә эшләрмен, уның исеме кем? – тип ҡыҙыҡай түҙмәй ныҡыша бит.

– Дошманыңдың исеме “С” хәрефенә башлана, – тинем.

Ҡыҙ уйға ҡалды. Оҙаҡ ҡына баҫып торҙо ла:

– Аҙағына тиклем әйтегеҙ инде, – тип тағын үтенде.

– Дошманығыҙҙың исеме - “Сигарет”, – тинем.

Ҡыҙыҡай миңә уҫал итеп ҡарарға ла, йылмайырға ла тырышып, өнһөҙ ҡалды.

– Биргән вәғәҙәгеҙҙе үтәгеҙ! – тинем.

Ул сигаретын ергә атып бәрҙе. Башҡаса уның тәмәке тартҡанын күрмәнем.

Автор: Юнир Салауатов.

Фото: wefit.ru