Әлегә хәлдәр һәйбәт

Башҡортостанда коронавирусҡа бәйле хәл әлегә тотороҡло. Был турала бөгөн Хөкүмәттә үткән оператив кәңәшмәлә әйттеләр. Башҡортостан Башлығы Радий Хәбиров белдереүенсә, республикала сирләгәндәр ҙә, коронавирус менән дауаханаға эләккәндәр ҙә кәмей башлаған. Әммә тынысланырға әле иртә.

Вице-премьер – һаулыҡ һаҡлау министры Максим Забелин белдереүенсә, һуңғы тәүлектә сирҙе 209 кеше йоҡторған, пандемия башланғаны бирле 124046 кеше сирләгән. 4720 кеше өйҙә дауалана, 77 пациент дауаханала. 18 кешенең хәле ауыр тип баһалана. Һауыҡҡан кешеләр ҙә күп, һуңғы тәүлектә генә 303 кеше сирҙе еңгән.

– Әлеге ваҡытта республикала коронавирус менән сирләгән кешеләр өсөн 1715 урын әҙерләнгән, уларҙың 62 проценты биләнгән, – тине Максим Забелин.

Республика буйынса Роспотребнадзор идаралығы етәксеһе Анна Казак белдереүенсә, Башҡортостанда коронавирус ҡына түгел, грипп һәм ОРВИ буйынса ла сирләү осраҡтары кәмегән. Һуңғы аҙнала 13440 киҙеү менән сирләү теркәлгән, был алдағы аҙна менән сағыштырғанда 39,7 процентҡа кәмерәк.

Салауат ҡалаһында бер мәктәп карантинда, шулай уҡ бер балалар баҡсаһы карантинға ябылған булған, ул бөгөн асылырға тейеш.

Роспотребнадзор барлығы 348 тикшереү үткәргән. Аэропортта тикшереүҙәр дауам итә, ун илдән килгән кешеләр өсөн сикләү әле һаман ғәмәлдә.

Фото: ufa.mk.ru