72 кешенең хәле ауыр

Бөгөн Хөкүмәттә үткән оператив кәңәшмәлә республиканың һаулыҡ һаҡлау министры Максим Забелин коронавирусҡа бәйле һуңғы хәлдәр тураһында һөйләне. Уның белдереүенсә, әле 72 кеше ауыр хәлдә.

Дөйөм һандар шундай: сирҙе пандемия башланғаны бирле 125560 кеше йоҡторған, уларҙың 240-ы һуңғы тәүлектә. 116600 кеше һауыҡҡан, 295-е бөгөн.

– Әле 4365 кеше ауырый, уларҙың 4232-һе өйҙә дауалана, 133 кеше – дауаханаларҙа ята. 72 кешенең хәле ауыр, улар интенсив терапия палатаһында ята һәм ғүмере өсөн көрәшә, – тине министр.

Бөгөн республикала йоғошло ауырыуҙар өсөн 1645 урын әҙерләнгән. Әле уларҙың 36 проценты биләнмәгән.

Вакцинация буйынса һандар шулай: уның беренсе компонентын – 2 253 973 кеше һалдырған. Был тейеш булғандарҙың 72 проценты. Тулыһынса прививканы 2 128 538 кеше яһатҡан (68 процент). 239852 кеше ревакцинация эшләткән. Башҡортостан бөтәһе 2 914 858 доза вакцина алған.

Вакцинация кимәле буйынса алдынғы райондар: Бүздәк, Шишмә, Әлшәй, Саҡмағош, Стәрлебаш, Кушнаренко, Өфө, Миәкә, Ҡариҙел, Баҡалы, Дүртөйлө, Тәтешле, Ҡалтасы, Дәүләкән, Асҡын, Шаран, Бишбүләк, Ғафури, Балтас, Ҡырмыҫҡалы, Ишембай, Нурман һәм Архангел райондары.

Артта ҡалғандар: Хәйбулла, Мәсетле, Бәләбәй, Мәләүез, Белорет райондары, Салауат, Бөрө, Күмертау, Октябрьский, Межгорье, Сибай ҡалалары.

Фото: kirov.kp.ru