Бары сабырлыҡ ярҙам итә...

Меңәрләгән табип һәм шәфҡәт туташтары бөгөн “ҡыҙыл зона”ла эшләй. Күптәре үҙҙәре лә ауырыны,  үкенесле юғалтыуҙар, ҡорбандар ҙа булды. Үлемесле сиргә ҡаршы көрәшеүҙе медицина хеҙмәткәрҙәре батырлыҡ тип иҫәпләйме?

Салауат ҡалаһының 2-се поликли­никаһында фельдшер булып эшләгән  Людмила Орлова, көн һайын ауырыуҙар менән осрашып, медицина ярҙамы күрһәтеүҙе ғәҙәттәге  көндәлек эше тип иҫәпләй.

– Һөнәремде бала саҡтан уҡ яратып һайланым. Йыш ауырый торғайным, “үҫкәс, мотлаҡ кешеләрҙе һәйбәт итеп дауалаясаҡмын”, тип хыялландым, – тип хәтерләй бала сағын Людмила.

Тәүҙә ул ауыл табиплыҡ амбулато­рияһында яҡташтарын дауалай, ә 2019 йылда Салауат ҡалаһы поликлиника­һына эшкә килә. Пандемия башланғас, уға “ҡыҙыл зона”ла хеҙмәт итергә тура килә.

– Ковид таралыу менән, тәүҙә табиптар араһында ла бер ни тиклем ҡурҡыу, хафаланыу тойғолары күренде. Тик был хәл күпкә барманы, үҙебеҙҙе ҡулға алдыҡ,  вирусҡа ҡаршы көрәште ғәҙәти эш булараҡ ҡабул иттек. “Бөтәһе лә яҡшы булыр,  түҙергә кәрәк” тип үҙебеҙҙе тынысландырҙыҡ, – ти Людмила.

Температураһы күтәрелгән ауырыу­ҙарҙы ҡабул иткәндә медицина хеҙмәт­кәрҙәренең дә зарарланыу хәүефе бик ҙур. Тәүге тапҡыр фельдшер 2020  йылдың август айында ауырый. Хәлде пневмония  ҡатмарлаштыра. Бөтә медицина хеҙмәткәрҙәре йыл башында вакцина яһата, тик Людмила йәнә инфекцияны йоҡтороп өлгөрә. Был юлы сирҙе еңел үткәрә. Хеҙмәттәштәренең күбеһе ауырый, ҡыҙғанысҡа ҡаршы, ҡорбандарһыҙ булмай. Людмила  менән бергә эшләгән Татьяна Комова сирҙе еңә алмай вафат була.

– Хеҙмәттәшебеҙҙең  хроник сирҙәре лә бар ине, пенсияға китергә  һис тә йыйынмағайны. Аҙаҡ тағы бер “уң ҡулыбыҙ”, поликлиникала терапевт булып эшләгән табибыҙ вафат булды, – тип уфтана фельдшер.

Уның фекеренсә, вакцина ауырыуҙар һанын кәметергә мөмкинлек биргән. “Хәҙер пациенттар һаны кәмене, сөнки күптәр вакцина яһатты, өҫтәүенә сир­ләгәндәр ҙә инфекцияны еңелерәк үткәрә”, – тип иҫәпләй фельдшер.

Людмилаға ҡайһы саҡта психолог ролен үтәргә, ауырыуҙы тынысландырырға, йыуатырға тура килә. Сирҙең мәкерлеген, үлемгә килтереү мөмкинлеген  аңлап, төшөнкөлөккә бирелеүселәр ҙә бар.

– Мин хеҙмәттәштәремә сабырлыҡ, тағы ла сабырлыҡ теләйем, – ти Людмила Орлова, – барыһы ла үтер, бөтә ауырлыҡтарҙы ла, көтөлмәгән һынау­ҙарҙы ла еңеп сығырға тейешбеҙ!

Динә АРЫҪЛАНОВА