Үҫмерҙәр өсөн вакцина етеп килә

Бөгөн Хөкүмәттә үткән оператив кәңәшмә коронавирусҡа бәйле мәсьәләне тикшереүҙән башланды. Әйткәндәй, ул онлайн тәртиптә үтә. Был донъяны яңы “омикрон” штамының ялмап алыуы менән бәйле.

Вице-премьер – һаулыҡ һаҡлау министры Максим Забелин белдереүенсә, Башҡортостанға ошо көндәрҙә үҫмерҙәр өсөн “Спутник М” вакцинаһының 2800 дозаһы киләсәк. Билдәле булыуынса, был прививка 12-нән 18 йәшкә тиклемге балалар өсөн тәғәйенләнгән.

Министр белдереүенсә, әле вакцина юлда, ул бөгөн-иртәгә килеп етәсәк.

Башҡортостан Башлығы Радий Хәбиров белдереүенсә, быйыл коронавирус пандемияһы арҡаһында Студенттар көнө уңайынан күп кешеләр ҡатнашҡан саралар булмаясаҡ.

– Коронавирусҡа бәйле хәлдәр ҡатмарлаша һәм яңы тулҡын көткән саҡта күп кешеләр ҡатнашҡан саралар үткәрелмәй торасаҡ. Нисек кенә булмаһын, студенттарҙы байрамдары менән ҡотлайбыҙ. Күренеүенсә, һуңғы йылдарҙа йәштәр үҙебеҙҙә ҡалһын өсөн күп нәмә эшләнә. Яңы белем биреү үҙәген үҫтерәбеҙ, кампус төҙөйбөҙ. Студенттарға ҙур уңыштар теләйбеҙ, – тине ул. 

Фото: joker.ykt.ru