Хәйбулла районының Мәмбәт ауылында "Бәхетле ҡатын" проекты буйынса сираттағы осрашыу үтте. Ғаилә хеҙмәте һәм район ҡатын-ҡыҙҙар советы ойошторған сарала санитар-эпидемиологик һаҡланыу талаптары үтәлеп, ауыл ҡатын-ҡыҙҙарына лекторий, оҫталыҡ кластары, консультациялар ойошторолдо.
Динә Аҡҡужина яңы проект тураһында мәғлүмәт бирҙе. Табип-эпидемиолог Илияхон Эгамова сәләмәтлекте һаҡлау, пандемия тураһында һөйләһә, Мәрйәм Хәйҙәрова сәләмәт тормош алып барыу буйынса кәңәштәр бирҙе. Һәр ҡатын-ҡыҙ үҙен һәр ерҙә бәхетле итеп тойорға тейеш, тине сығыш яһаусылар.
Сарала шулай уҡ ҡатын-ҡыҙҙарҙың биҙәүес әйберҙәрен эшләү, картина сигеү, массаж һәм косметика, сәләмәт тормошто пропагандалау һәм спортҡа ылыҡтырыу буйынса төрлө һауыҡтырыу күнекмәләре күрһәтеү - гүзәл заттар өсөн бигерәк тә фәһемле һәм кәрәкле булды. Был көндә Мәмбәт ҡатын-ҡыҙҙары барыһы ла үҙен бәхетле итеп тойҙо һәм киләсәктә матурлыҡҡа ынтылып, яратҡан шөғөлдәрен үҙ итеп, ғаиләһендә лә, тормошта ла үҙен бәхетле итәсәгенә инанды.
Фотолар: Мәмбәт ауылы моделле китапханаһы сайтынан.