Башҡортостанда коронавирус инфекцияһын йоҡторғандар һаны 200 меңгә етеп килә. Һуңғы тәүлектә сирҙе йәнә 4 302 кеше эләктергәне асыҡланды.
“Тәүлек эсендә ауырыу осраҡтарының кәмеүен һәм дауаханаға һалыу үҫеше күҙәтелмәүен күрәбеҙ. Был хәл һөйөндөрә һәм күпселектең сирҙе еңел үткәреүе тураһында һөйләй”, – тине коронавирус таралыуын иҫкәртеү буйынса үткәрелгән брифингта һаулыҡ һаҡлау министры Максим Забелин.
Уның әйтеүенсә, пандемия башланғандан алып ковидтан 154 600 ауырыу һауыҡтырылған. Әле дауаханаларҙа 285 пациент, 39-ы ауыр хәлдә. Тәүлек эсендә 19 ауырыуҙың вафат булғаны билдәле. Вакцинаның ике компонентын да алғандар һаны 2 303 322 тәшкил итә.
Министр ковидҡа антиесемдәре булған кешеләргә QR-кодты нисек бирәсәктәрен аңлатты.
“21 февралдән медицина ойошмаларына мөрәжәғәт итмәгәндәр ҡандағы антиесемдәр буйынса QR-код алыу мөмкинлегенә эйә. Антиесемдәрҙең күпме булыуы мөһим түгел, бары “Роспотребнадзор” исемлегендәге аккредитацияланған лабораторияла тест бирергә кәрәк. Антиесемдәрҙең булыуы пациентты системаға индереү һәм “Дәүләт хеҙмәттәре”ндә QR-код алыу өсөн нигеҙ буласаҡ”, – тип белдерҙе Максим Забелин.
Бындай код бары ярты йыл хеҙмәт итәсәк. Вакцина яһатҡандар йәки сирҙе кисергәндәрҙең сертификаттары 12 ай буйына яраҡлы һанала. Өҫтәүенә антиесемдәр нигеҙендә бирелгән QR-кодтарҙы бер тапҡыр ғына алырға мөмкин.
Фото: Горобзор.ру