Организмдағы артыҡ тоҙҙан нисек ҡотолорға?

Кеше организмында тоҙ тупланыуы – үҙен һиҙҙертмәй барған процесс, шуға күрә проблемаға күп осраҡта һуң иғтибар итәләр. Тоҙҙарҙан ҡотолоу өсөн тәү сиратта организмды таҙартырға кәрәк.

Петрушка һәм лимон

Бының өсөн балдан, петрушканан һәм бер-ике лимондан әҙерләнгән бәүел ҡыуыу сараһын ҡарарға тәҡдим итәбеҙ.

Ингредиенттар: 250 грамм петрушка тамыры, 150 грамм петрушка япрағы, 250 грамм лимон, 300 грамм бер аҙ йылытылған бал.

Әҙерләү. Петрушканың тамырын, лимонды ҡабығы менән бергә ит турағыс аша үткәрергә. Ҡатнашмаға ваҡ итеп туралған петрушка япрағы һәм бал өҫтәп, барыһын да ентекле бутарға. Был ҡатнашманы көн һайын өс тапҡыр берәр сәй ҡалағы ҡабул итергә. Шуны билдәләп үтергә кәрәк: бөйөрҙәрҙә таш булмауына инаныу өсөн, тәү сиратта УЗИ үтергә кәрәк. Организмда таш булған осраҡта, был ҡатнашманы ҡабул итергә ярамай.

Йәшел сәтләүек ҡабығынан төнәтмә

Тағы бер төнәтмәгә иғтибар итергә мөмкин: ул йәшел (бешеп өлгөрмәгән) сәтләүек ҡабығынан әҙерләнә. Ул да тоҙ ултырмаларынан тиҙ арынырға ярҙам итә.

Ингредиенттар: 40 йәшел грек сәтләүеге, 2,5 литр һыу.

Әҙерләү. Сәтләүек ҡабығын айырып алып, 2,5 литр һыуға һалып, талғын утҡа ҡуйырға һәм 30 минут тирәһе ҡайнатырға. Һыуынғас, ҡараңғы урынға алып ҡуйырға.

Төнәтмәне яртышар стакан иртән, көндөҙ һәм йоҡо алдынан ҡабул итергә кәрәк. Дарыу яҡынса бер аҙнаға етә, шуға күрә киләһе ете көн өсөн тағы ошондай төнәтмә әҙерләргә кәрәк. Биш аҙна эскәндән һуң бер ай ял итергә.

Бындай төнәтмә организмында йод артыҡ булған кешеләргә тыйыла.

Фото: infopechen.ru