Башҡортостан
-11 °С
Болотло
VKOKРУС
Бөтә яңылыҡтар
Сәләмәт булайыҡ
11 Март 2022, 20:25

Әүҙемлеккә ни етә!

riac34.ru
Фото:riac34.ru

Спорт һәм сәләмәт тормош рәүеше үҙ-ара тығыҙ бәйләнгән. Юҡҡамы ни, сәләмәт тәндә – сәләмәт рух, тип әйтәләр? Бының менән бәхәсләшеп булмай: ғәҙәттә, спортсылар – әүҙем, маҡсатлы, алға ынтылыусан, көслө кешеләр. Спорттың сәләмәтлеккә һәм холоҡ-фиғелгә ыңғай тәьҫир итеүе күптән фән ярҙамында иҫбатланған, бәхәсләшеү урынһыҙ.

Спорт менән даими шөғөл­ләнгәндә, йөрәк яҡшыраҡ эшләй, инсульт һәм инфаркт ихтималлығы кәмей, ҡан әйләнеше яҡшыра. Унан тыш, физик күнекмәләр кешенең тышҡы ҡиәфәтен дә яҡшырта, буй-һын да һомғоллана. Унан тыш, даими күнегеүҙәр стресс булдырмай, кәйефте кү­тәрә, эшлеклелек сифаты арта. Шуға ла спорт менән бала саҡтан шөғөлләнгәндәр өлкәнәйгәс тә йәш, матур күренә, сирҙәргә би­решмәй һәм гел яҡшы кәйефтә була.

Был йәһәттән “Айыҡ ауыл” проекты координаторы, медицина фәндәре докторы, Бөтә донъя башҡорттары ҡоролтайы Президиумы ағзаһы Сәлиә Мырҙабаева үҙ фекерен белдерҙе: “Һәммәбеҙгә мәғлүм: мәғлүмәт белһәң, донъяға хужа булырһың. Халыҡтың төрлө категориялары физик культура һәм спорт менән шөғөлләнһен өсөн дөйөм белем биреүсе ойошмаларҙың спорт инфраструк­тураһын ҡулланыу мөмкинлеген киңәйтеү йәһәтенән Рәсәйҙең Мәғариф һәм Спорт министр­лыҡтары әҙерләгән методик кәңәштәр барыһына ла билдәлеме икән?

Улар физик культура һәм спорт менән даими шөғөлләнеүсе граж­дандарҙың һанын арттырыу маҡ­са­тында урындағы үҙидара органдары етәкселәренә йүнәлтелгән. Һәр ауыл һәм ҡалала күпме кеше йәшәүгә ҡарамаҫтан, сәләмәт йәшәү рәүеше алып барыу өсөн тигеҙ мөмкинлектәр булдыры­лыр­ға тейеш. Роспотребнад­зорҙың был йәһәттән әҙерләгән документында иһә спорт менән шөғөл­ләнеү өсөн белем биреү ойошма­ларының спорт биналарын һәм биләмәләрен файҙаланыу сани­тарияға ҡағылышлы ҡануниәттә тыйылмағанын билдәләй.

Методик тәҡдимдәр 2021 йылдың сентябрендә раҫланған, республика Мәғариф министр­лығы, “Айыҡ ауыл” конкурсының ойоштороу комитеты тәҡдиме менән, 2022 йылдың 10 февра­лендә республиканың барлыҡ район һәм ҡалаларына ебәргән. Һеҙҙе ҡоралландырҙыҡ, бурысығыҙ – был маҡсатты һәр ауылда тор­мошҡа ашырыу. Тимәк, фитнес-клубтарығыҙ юҡ икән, әммә мәктәп­тәр һәм колледждар, уларҙың спорт залдары бар!

Башҡортостандың Мәғариф һәм фән министрлығы мәғлүмәт­тәре буйынса, халыҡтың башҡа категориялары өсөн дөйөм белем биреү ойошмаларының спорт инфраструктураһын файҙаланыу кимәле уртаса  65 процент самаһы, әммә халыҡтың һаулығын һаҡлау өсөн бөтә ресурстарҙы ла файҙа­ланырға тейеш булған райондар бар әле.

Конкурс тураһындағы положе­ниеға, дөрөҫөрәге, конкурсҡа йом­ғаҡ яһағанда баһалау критерийына Мәғариф һәм фән министрлығы мониторингы мәғлүмәттәрен дә иҫәпкә алған өҫтәмәләр индере­ләсәк. Һеҙҙән яуап көтәбеҙ, хөрмәтле конкурста ҡатнашыу­сылар. Проблемалар тыуһа, ярҙам итербеҙ”, – тип белдерҙе Сәлиә Шәрифйән ҡыҙы.

Гүзәлиә БАЛТАБАЕВА

Читайте нас в