Максим Забелинға – Пирогов ордены

Рәсәй Президенты Владимир Путин һаулыҡ һаҡлау өлкәһендәге ҡаҙаныштары һәм күп йыллыҡ намыҫлы хеҙмәте өсөн Башҡортостан Хөкүмәте Премьер-министры урынбаҫары – һаулыҡ һаҡлау министры Максим Забелинды Пирогов ордены менән наградлау тураһындағы Указға ҡул ҡуйҙы.

Награда хәрби-ялан хирургияһы һәм фәнни дисциплина булараҡ хирургияға нигеҙ һалған рус хирургы, ғалим, педагог Николай Иванович Пирогов исемен йөрөтә. Ул ғәҙәттән тыш хәл шарттарында, эпидемиялар, хәрби хәрәкәттәр, ғүмер өсөн хәүеф тыуҙырған башҡа ваҡиғаларҙа медицина ярҙамы күрһәткәндәге фиҙакәрлек, айырыуса хәүефле сирҙәрҙе диагностикалау, иҫкәртеү, дауалау эшен тәьҫирле ойошторған һәм башҡа ҡаҙаныштар өсөн бирелә.

Максим Забелин белгеслеге буйынса – хирург. Хәрби-медицина академияһын, уның интернатураһын, Рәсәй Оборона министрлығының Табиптарҙың белемен камиллаштырыу дәүләт институтының клиник ординатураһын тамамлаған. Медицина фәндәре докторы. Хеҙмәт эшмәкәрлеген 20 йыл элек Курск ҡалаһында Рәсәй Оборона министрлығы авиабазаһының медицина хеҙмәте начальнигы булып башлай. 2019 йылдың ноябрендә Башҡортостан һаулыҡ һаҡлау министры итеп тәғәйенләнде. 2021 йылдың мартынан Башҡортостан Хөкүмәте Премьер-министры урынбаҫары вазифаһы өҫтәлде.

Текст һәм фото сығанағы: Башҡортостан Хөкүмәте сайты.