Йоҡонан яҙһаң, һаулығыңдан ҡолаҡ ҡағырһың

Йоҡоң туйһа, кәйефең яҡшы булыр, сөнки ул беҙгә энергия бирә. Һәр беребеҙ ғүмеренең өстән бер өлөшөн йоҡлап үткәрә. Төндә организмда ҡан сос­тавы яңыра, нервы системаһы күҙәнәктәре тергеҙелә, иммунитет нығый (зарарлы микроорганизмдар һәләк була, файҙалылары үрсей), иң мөһиме – кеше иртәгәһе көнгә көс йыя.

Насар йоҡлау йәки йоҡо туймау тормош сифатында сағылыш таба. Даими ары­ғанлыҡ, төшөнкө кәйеф, ҡуҙ­ғыусанлыҡ насар йоҡлауҙың  бер нисә билдәһе генә. Үке­нескә ҡаршы, беҙ йыш ҡына, ваҡыт етмәү сәбәпле, йоҡо иҫәбенә ниндәйҙер эш баш­ҡарабыҙ. Ахырҙа сәләмәтлек ҡаҡшауы һөҙөмтәһендә йөрәк-ҡан тамырҙары, апноэ, диабет, Альцгеймер сирҙәренә юл асабыҙ. Шуға күрә йоҡо сифатын күҙәтеп, сәләмәтлеккә бәйле проблемаларҙы ваҡы­тында хәл итеү кәрәк. Төндә һәм иртән  күҙәтелгән кинәт үлеү осраҡтары асфиксия кеүек хроник респиратор сирҙәре өҙлөгөүҙәре менән бәйле, тип иҫәпләй оториноларингологтар. Апноэ синдромы тыуҙырған, ваҡытында диагноз ҡуйылмаған йоҡо килеү­сәнлек йыш ҡына юл-транспорт фажиғәләренә, инвалид­лыҡҡа, үлемгә алып килә. Ә төнөн һәм иртә менән  артериаль гипертензия менән ярашып, мейе инсульттарына, миокард инфаркттарына  юлыҡтырыуы мөмкин.

Сәләмәт йоҡо мейенең яҡшы эшләүенә, матдәләр алмашыуына, ҡан баҫымының кәмеүенә  йоғонто яһай. Йоҡо туймау иммунитетты ҡаҡшата, һөҙөмтәлә төрлө сирҙәр баш ҡалҡыта башлай. Ябай ғына ҡағиҙәләрҙе үтәү һаулығы­ғыҙҙы һаҡларға ярҙам итер.

Беренсенән, бер үк ваҡытта йоҡларға ятырға һәм бер үк ваҡытта торорға ғәҙәтләнегеҙ. Организм физиологияһы  ошо тәртипкә буйһона. Икенсенән, йоҡоға әҙерлек тә кәрәк. Тыныс, классик музыка тыңлау, китап уҡыу, йылы һыу процедуралары ҡабул итеү фай­ҙаға булһа, йоҡлар алдынан компьютер, планшет артында ултырыу  зарар ғына килтерер. Зәңгәр төҫтәге экрандар йоҡо гормоны – мелатонин етеш­терелеүенә кире тәьҫир итә, күҙҙе ныҡ арыта.

Йоҡлар алдынан саф һауа­ла йөрөргә тырышығыҙ. Бүл­мәгеҙ ҡараңғы, елләтелгән, түшәгегеҙ уңайлы булһа, рә­хәтләнеп йоҡоға талырһығыҙ. Йоҡо өсөн “алтын ваҡыт” – 22.00-нән 02.00 сәғәткә тиклемге арауыҡ.

Динә АРЫҪЛАНОВА