Шуҡтар, тиктормаҫтар...

Йәйгеһен саф һауала уйнау балалар өсөн бик файҙалы. Сынығыу һәм үҫеү өсөн дә, иммунитетты күтәреү өсөн дә... Тышта йөрөгәндән һуң аппетит күтәрелә, тын алыу ағзалары яҡшыраҡ эшләй башлай.

Ғөмүмән, йылдың бөтә миҙге­лендә, тәбиғәт шарттары ниндәй булыуына ҡарамаҫтан, урамға сығырға кәрәк. Өҫ һәм аяҡ кейеме һауа торошона ярашлы уңайлы булһын. 

Бала менән бергә йөрөргә сыҡҡанда ла, тиктормаҫ улығыҙ йәки ҡыҙығыҙҙың йығылып, аяҡ-ҡулдарын һыҙырыуы, йәрәхәтлә­үе ихтимал. Шуҡ балалар хә­рәкәтсән, уларҙы тышта тыйып тороу ҙа ҡайһы саҡта ҡулдан килмәй. Педиатрҙар ата-әсәгә һыҙырылған, сыйылған, яралан­ған тән тиреһен антисептик иретмә менән эшкәртергә, йоғош­һоҙландырыу өсөн стерилләнгән бинттар ҡулланырға тәҡдим итә. “Балағыҙ менән урамға, паркка, урманға сыҡһағыҙ, үҙегеҙ менән водород перекисы һалынған бәләкәй генә шешә, стерилләнгән бинт һәм бактерицидлы пластырь алығыҙ, – тип кәңәш итә  табиптар. – Антисептиктар булмаһа, ғәҙәти таҙа һыу ҙа яраны бысраҡтан таҙартырға ярҙам итер”.

Йәй – күңелле ял миҙгеле. Ул ысын мәғәнәһендә ҡәнәғәтләнеү тойғоһо килтерһен, бәлә-ҡаза урап үтһен өсөн теремек, донъя­ны танып белергә ашыҡҡан балаларығыҙҙы күҙ уңынан ыс­ҡындырмағыҙ, һаҡланыу сараларын инҡар итмәгеҙ.

Динә АРЫҪЛАНОВА