Марат ағайҙың ишеген бәлә шаҡыған...

Баймаҡ районының Темәс ауылынан оҫта ҡуллы рәссам Марат Ғафаровтың ижадына битараф түгелмен. Күптән эштәрен күҙәтеп барам. Ысынлап та, уның 3D картиналары күптәрҙә һоҡланыу уята: бына гараж ҡапҡаһындағы рәсемдәге аттар тере кеүек, тотоп һыйпағы килә, йә хатта бесәй ҙә йырынға төшөп китеүҙән ҡурҡып, иҙәндәге һүрәт-йылға аша һалынған баҫманан ғына йөрөй, йә Мәскәй әбейҙең тотоп торған табаһына сиратлап "менеп ултырып" фотоға төшөргә була...

Тик май башында Марат ағай шәхси сәхифәһендә йән өшөткөс яңылыҡ яҙып ҡуйҙы: "Дуҫтар тағы ла картиналар яҙа алырмынмы, юҡмы – барыһы ла Хоҙай ҡулында. Дөйәләр менән картинаны тиҙ генә эшләп бөтөрҙөм, күңелемдә ошондай темаларға тағы эшләргә ниәтем бар ине, артабан нисек булыр, һаулыҡ яғы насарайып китте... Әлеге ваҡытта һаулыҡты тикшереү өҫтөндәмен".

Ағайҙың хәлен белешеп үҙе менән һөйләштем. Ысынлап та, хәл етди икән (баш мейеһендә шеш). Уны ҡатмарлаштырған шарттар ҙа бар. Шуға тиҙ һәм йылдам эш итергә кәрәк, иң яҡшыһы – Мәскәү табиптарына күренеү.

Рәссам уның хәлен белешеп, теләктәшлек белдергән кешеләрҙең күп булыуына ҡыуана, рәхмәт әйтә. "Шуныһы ҡыуандыра: минең ижадыма халҡыбыҙ битараф түгел икән, бик күп кеше шылтырата, уйламаған-белмәгән ҡәрҙәштәр ҙә ярҙам итергә әҙер. Дуҫтарым, класташтарым интернетта яҙмалар урынлаштырған, хатта бер уҡыусы баланың яҙғанын уҡып, күҙемдән йәштәр килеп сыҡты: хәлемдән килгәнсә тип, ун һум аҡса күсергән... Минең үҙемдең дә тормошҡа ҡарашым ныҡ үҙгәрҙе, кешеләрҙе лә яҡшыраҡ аңлай башланым, дингә яҡынайҙым", – тине ул.

Һаулыҡ теләйбеҙ һеҙгә, оҫта! Һеҙ беҙгә кәрәкһегеҙ!

Фото: М. Ғафаровтың шәхси сәхифәһенән.