Башҡортостан
+21 °С
Болотло
VKOKРУС
Бөтә яңылыҡтар

Ял итеү өсөн нисә көн кәрәк?

Баш мейеһенә тәнәфес биреү мөһим.

ufa.time
Фото:ufa.time

Кешегә ысын мәғәнәһендә ял итеү өсөн күпме ваҡыт талап ителә? Психология фәндәре кандидаты Светлана Колосова әйтеүенсә, психологик көсөр­гәнештән бер нисә көндә арыныу мөмкин түгел. Был хаҡта ул Sputnik радиоһына биргән интервьюһында һөйләне.

“Беҙ эштә, физик арып-талсы­ғыу­ҙан тыш, психологик яҡтан ныҡ арыйбыҙ. Ни өсөн кешенең ял ит­кеһе килә? Сәбәбе – мейегә көсөр­гәнештең ҙур булыуы. Кеше көн һа­йын үҙенең хәтере аша әллә күп­ме мәғлүмәтте үткәрә. Психологик баҫым ныҡ арыта, шуға күрә физик ял итеү генә кешегә етмәй”, – ти эксперт.

Кешегә ял итеү өсөн өс көндән бер аҙнаға тиклем ваҡыт кәрәк, әм­мә сифатлы ысын ял өсөн өс аҙ­на ваҡыт талап ителә. Был осор­ҙа шөғөлдәр төрөн алыштырыу мө­һим тип иҫәпләй ғалим. Әгәр беҙ баш мейеһенә ял итергә мөм­кинлек бирмәйбеҙ икән, хеҙмәт етештереү­сәнлеге аҡһаясаҡ, кәйеф төшәсәк, сәләмәтлек ҡаҡшаясаҡ. Хәҙерге за­ман кешеһе самаһыҙ рәүештә ҙур көсөргәнеш менән эшләй. Эш көнөнән һуң арып-талсыҡҡанын өйгә ҡайтҡас ҡына тоя. Бындай ритмда йылдар буйы эшләү сәлә­мәтлектә, ижади ҡеүәттә, хеҙмәт си­фатында сағыла. Үҙен гел ары­ған, йонсоған ҡиәфәттә күргән кешене бәхетле тип атап булмайҙыр.

Баш мейеһенә ял бирергә кәрәк тип иҫәпләй белгестәр, тәнәфес яһағандан һуң ижади фекерләү, уйлау ҡеүәһе яҡшыра. Һауыт-һаба йыуыу, баҡсала эшләү, урманда йө­рөү һәм башҡа аҡыл эшмә­кәр­леге менән бәйле булмаған шө­ғөлдәр кешегә бик кәрәк. Социаль селтәрҙәр ял итергә ныҡ ҡама­сау­лай. Кәрәге булмаған юҡ-бар хәбәр­ҙәр, нервы ҡуҙғытҡан негатив мә­ғ­лүмәттәр бары психологик көсөр­гәнеш, стресс тыуҙырырға һәләтле. Дөрөҫ ял итеү оҙайлы бәхетле ғүмер кисерергә ярҙам итер.

-  Динә АРЫҪЛАНОВА

Читайте нас в