Осҡор булһын күҙегеҙ!

Үҫемлектәр, емеш-еләк араһында күҙгә бәйле сирҙәрҙе иҫкәрткән, күреү һәләтен яҡшыртҡандары ла бихисап.

Кесерткән. Бер аш ҡалағы кипкән үләнде 200 мил­лилитр ҡайнар һыуға һалып, 15-20 минут тө­нә­тер­гә. Көнөнә өс тапҡыр берәр аш ҡалағы эсергә. Ке­серткәндең ҡанды ҡуйыртыуын оноторға ярамай.

Гөлйемеш. Бер аш ҡалағы кипкән, онталған емеште ике стакан эҫе һыуға һалып, ун минут талғын утта ҡайнатырға һәм ике-өс сәғәт төнәтергә. Ярты стакандан көнөнә өс-дүрт тапҡыр эсергә.

Ҡара ҡарағат. Бер аш ҡалағы япраҡты бер стакан ҡайнар һыуҙа 15-20 минут төнәтергә. Көнөнә 0,5-1 стаканлап сәй урынына эсергә. Ер еләге һәм уның япрағы ла ошондай уҡ сифатҡа эйә, тик уны ике сәғәт самаһы төнәтеп, көнөнә өс тапҡыр берәр аш ҡалағы ҡабул итергә.

Алоэ. Дарыуханала һатылған алоэ һутын көнөнә ике-өс тапҡыр бер балғалаҡ эсергә (ашауҙан 20-30 минут алда). Үҫемлектән үҙегеҙ һут һығып, ошо уҡ рецепт буйынса ҡуллана алаһығыҙ.

Ҡара көртмәле. Емештең үҙен ашарға ла, компот яһарға ла мөмкин. Уны туңдырып, киптереп һаҡларға ла була.

Гөлдәр ЯҠШЫҒОЛОВА