Кешеләрҙе ҡотҡарыусы фәрештә

Шәфҡәт туташы... Эш һөймәгән һәм кешеләргә мәрхәмәтле, миһырбанлы була белмәгәндәр был һөнәрҙе һайламайҙыр. Ауырыуҙарҙы ҡабул итеү, уларға тамыҙғыс менән укол ҡуйыу, тән температураһын үлсәү, ҡан баҫымын даими күҙәтеүҙә тотоу, ауыр хәлдәге пациенттарҙы ҡулдан ашатыу һәм башҡа бөтмәҫ-төкәнмәҫ эште башҡарыр өсөн таһыллыҡ та, етеҙлек тә кәрәк.

Мораҡ үҙәк район дауа­ханаһының хирургия бүлеген­дә һәм реанимацияла үҙ һөнә­ренең оҫталары – хәстәрлек­ле шәфҡәт туташтары эшләй. Шуларҙың береһе – анестезиолог, шәфҡәт туташы Рима Үлмәҫбаева тураһында булыр һүҙебеҙ. Алсаҡ йөҙлө, талапсан, коллегалары һәм халыҡ араһында абруй яулаған намыҫлы хеҙмәт­кәрҙең реанимацияла эшлә­үенә тиҙҙән 30 йыл тула.

– Еңел булмаһа ла, эште яратҡас, барыһына ла күне­гелгән, – ти ул. – Беҙҙә күп­селек операциянан һуң, юл һә­лә­кәтенә осраған, эсеп ағыуланып комаға киткәндәр, йәғни ныҡ ауыр хәлдәгеләр түшәктә ята. Йәйгеһен балалар йыш имгәнеүсән, йәрәхәт­ләнеүселәр, ҡул йәки аяҡта­рын һындырыусылар арта. Хирургия бүлеге менән бер­лектә, бер-беребеҙгә яр­ҙам итешеп эшләргә ғәҙәтлән­гәнбеҙ, шунһыҙ булмай.

Рима Хәлил ҡыҙы Күгәрсен районының Ғәзиз ауылында эшһөйәр, татыу ғаиләлә тыуып үҫкән. 1989 йылда Мораҡ­тағы 2-се урта мәктәпте та­мам­лаған алдынғы уҡыусыға ғүмерен мәғариф өлкәһенә бағышлаған атаһы ҡәтғи рәүештә былай ти:

– Йә медицина йүнәлешен һайлайһың, йә педагогия учи­лищеһына уҡырға бара­һың, ҡыҙым, алдыңда ике генә юл!

Әлбиттә, йәш ҡыҙҙа аҡ халат кейеп, кешеләргә ярҙам итеү теләге өҫтөнлөк ала. Ул Салауат медицина училище­һына уҡырға инә.

Ҡулына диплом алғас, йәш белгес тыуған яғына эшкә ашҡынып ҡайта. Хеҙмәт юлын 1992 йылда Побоище ауылында фельдшер булараҡ башлай. Бер йылдан эшкә яуаплы ҡараған, тилбер ҡул­лы, төплө белемле өмөтлө хеҙ­мәткәрҙе Мораҡ район үҙәк дауа­ханаһының хирургия бү­легенә саҡыртып алалар.

Намыҫлы хеҙмәткәр – өс балаға изгелекле, хәстәр­лекле әсәй, тормош юлдашы Фәрит Абдулла өсөн ышаныслы, һөймәлекле ҡа­тын.

Ә алда тынғыһыҙ йәнле, шәфҡәт нуры өләшкән аҡ халатлыға коллегалары, хирургия бүлеге табиптары һәм шәфҡәт туташтары менән бергә күпме кешегә ярҙам ҡулы һуҙаһы, өмөт һүнгән күҙҙәрендә йәшәү сатҡыһын уятаһы бар әле.

- Гөлшат СӘЙЕТБАТТАЛОВА

Күгәрсен районы