Һөт биҙе шеше – исемлектә беренсе

Ҡатын-ҡыҙҙарыбыҙҙың ғүмеренә хәүеф менән янаған һөт биҙе яман шеше элеккесә ауыр сирҙәр исемлеге башында тора. Йыл һайын республиканың күбеһе 50 йәштән уҙған 1 800 гүзәл затында был ҡурҡыныс сир асыҡлана. Йәш ҡатындарҙа сир айырыуса агрессив рәүештә үтә, ти онкологтар.

Республика онкология үҙәгендә был сирҙе дауа­лауҙың яңы ысулын ғәмәл­гә индергәндәр. Табиптар  махсус маркерҙар ярҙа­мында барлыҡҡа килгән яңы шештәрҙе те­үәллек менән алып ташлай. Был дауалау ысулы һауыҡ­тырыу яғы­нан да, косметик йәһәттән дә күпкә  отош­лораҡ. Уны сир­ҙең төрлө стадияларында файҙа­ланып була.

Экрандағы ҡара тап – яман шеш. Хирургтың бурысы – ювелирҙарса аныҡлыҡ менән уның үҙәгенә барып етеп, титан маркерын ҡалдырыу. Шул рәүешле табиптар яман шештең урынын асыҡ билдәләй. Химия йәки радиотерапия менән дауа­лауҙа шештәр ярайһы ғына кәмеүе йәки бөтөн­ләй үҙенән-үҙе таралып юҡҡа сығыуы ихтимал. Тик был осраҡта ла хирургтар уларҙың тәүҙә барлыҡҡа килгән урынын яман шеш күҙәнәктәренән азат итеп алып ташларға тейеш. Ҡайһы саҡта күҙәнәктәрҙең бер өлөшө организмда ҡала, тимәк, операциянан һуң дауа­ланыуҙы дауам итергә кәрәк.

Был мөһим!

Яңы ысулды сир баш­ланған осорҙа, шеш бәләкәй саҡта ҡулла­налар.

Үкенескә ҡаршы, сир­ҙең башланып ҡына торған  мәлендә па­циент­тарҙың ни бары бер процентында яман шеш асыҡлана икән.

Табиптарҙың ҡатын-ҡыҙҙар өсөн төп кәңәше – табип-маммологка йыл һайын күренеү. 50 йәшкә тиклем маммографияны кәм тигәндә өс йылға бер, артабан ике йылға бер тапҡыр үтеү кәрәк.

Яңы ысулды сир баш­ланған осорҙа, шеш бәләкәй саҡта ҡулла­налар. Шуға бер миҫал. Ирина тигән ҡатында яман шеш­тең икенсе стадияла икәне асыҡлана. “Күкрәк шешен осраҡлы ғына һиҙеп ҡал­дым. Бәләкәй генә төйөрҙөң ультратауыш тикшереүе үткәндән һуң яман шеш икәнлеге асыҡланды. Табип миңә онкология үҙә­генә барып анализдар бирергә ҡушты. Бына хәҙер мин диспансерҙа”, – ти ҡатын.

“Әгәр шеш үҙ ҡул­да­рың менән тотоп асыҡ­ларлыҡ булған икән, был бик насар, – ти табип. – Республика онкология үҙәгендә иҫ киткес ҙур теүәллек менән эшләгән һанлы маммограф бар, ул һөт биҙендә хәүефле сирҙе хәбәр иткән мик­рокальцинаттарҙы асыҡ­ларға һәләтле. Диагнозды раҫлау йәки кире ҡағыу өсөн биопсия үткәрәләр”.

Үкенескә ҡаршы, сир­ҙең башланып ҡына торған  мәлендә пациент­тарҙың ни бары бер процентында яман шеш асыҡлана икән. “Элек республикала бындай биопсия юҡ ине. Микро­акальцинаттарҙың барлы­ғын, шик тыуҙырған участ­каларҙы башҡа ысулдар менән тикшереү бик ауыр, хәҙер бындай уңайлы ысул үҙләштере­лә”, – ти диспан­серҙың бүлек мөдире Булат Ибраһимов.

Табиптарҙың ҡатын-ҡыҙҙар өсөн төп кәңәше – табип-маммологка йыл һайын күренеү. 50 йәшкә тиклем маммографияны кәм тигәндә өс йылға бер, артабан ике йылға бер тапҡыр үтеү кәрәк. Сирҙе иртә стадияла асыҡлау өсөн тикшереүҙе һанлы ҡорамалда башҡарыу мөһим. Ҡыҙғанысҡа ҡаршы, ул әлегә ҡайһы бер район дауаханаларында юҡ.

Динә АРЫҪЛАНОВА