Бәшмәк бәлә килтермәһен

Башҡортос­тан Һаулыҡ һаҡлау министрлы­ғының матбуғат хеҙмәте хәбәр итеүенсә, быйыл ете айҙа республикала бәшмәк менән ағыула­ныуҙың 15 осрағы теркәлгән. Һөҙөмтәлә 17 кеше, шул иҫәптән 14 йәшкә тиклемге бер бала зыян күргән.

Бәшмәк менән ағыуланыуҙың төп сәбәптәре – ашарға яраған һәм ағыулы бәшмәктәрҙе айыра белмәү, дөрөҫ бешермәү. Ағыу­ланыу билдәләре: баш ауыртыу, ҡоҫоу, тәүлегенә 10 – 15 тапҡыр эс китеү, ашҡаҙандың ныҡ ауыртыуы. Пульс әкренәйә, аяҡ-ҡулдар һыуына. “Бәшмәктең бик насар сир – ботулизм – сығанағы булыуы ихтимал. Уның таяҡсалары ерҙә бар. Консервалау алдынан бәшмәктәр насар таҙартылһа һәм йыуылһа, уларҙың өҫтөндә ошо сирҙе ҡуҙғытыу­сыларҙың ҡалыуы ихтимал. Был ауырыуҙы эләктермәҫ өсөн бәшмәкте ныҡлап йыуырға, тупраҡтан таҙартырға кәрәк. Шулай уҡ уларҙың яңы ғына йыйылған, сифатлы булыуы мотлаҡ”, – тип белдергәндәр ведомствола.

Ботулизм сиренең билдәләре бәшмәкте ашағандан һуң 12 – 72 сәғәт үткәс күренә. Улар – баш ауыртыуы, ауыҙ кибеүе, ҡоҫоу, эс китеү, йотоуҙың ауырлашыуы һәм күреү насарланыуы. Ошо әйтел­гәндәрҙең береһе генә булған осраҡта ла тиҙ арала табипҡа күренегеҙ.

Айһылыу НИЗАМОВА