Иң яҡшыһы – табип кәңәше

Тышта көҙгө һалҡынлыҡ тантана итә. Ҡышҡылыҡҡа иммунитетты бер аҙ нығытыу ҡамасауламаҫ, шуға күрә түбәндәге бик ябай салат һәм һуттарҙы ҡулланып ҡарағыҙ.

Ғәҙәттә, күптәр сөгөлдөрҙө бешереп ашарға ғәҙәтләнгән. Әммә диетологтар тамыраҙыҡтарҙы сей килеш тә туҡ­ла­ныу рационына индерергә кәңәш итә.

Бер самала алынған кишер, сөгөл­дөр, алманы ҡырғыс аша үткәреп, ҡаймаҡҡа болғап ашарға ғәҙәтләнегеҙ. Тәменә ҡарап, аҙ ғына шәкәр йәки бал өҫтәргә мөмкин. Был салатты даими ҡулланыу иммунитетты нығыта, организмды таҙарта.

Бешмәгән сөгөлдөр менән кишер­ҙең һуты ла ифрат файҙалы. Ул ашҡаҙан-эсәк эшмәкәрлеген яҡшырта, нервы системаһына яҡшы тәьҫир итә, йөрәкте һәм ҡан тамырҙарын нығыта, эшкә һәләтлелекте арттыра, көс-дәрт өҫтәй, организмды токсиндарҙан таҙарта.

Сөгөлдөр һуты менән халыҡ элек-электән ангинаны бик һөҙөмтәле дауалаған. Бының өсөн көнөнә бер нисә тапҡыр тамаҡты сайҡатырға кәрәк. Ә инде бешмәгән сөгөлдөрҙән яһалған салатты даими ашау йәки уның һутын эсеү был сирҙе иҫкәртеүҙә бик һөҙөмтәле сара иҫәпләнә.

Организмда таш булғанда, пиелонефрит, гидронефроз, ашҡаҙан сей яраһы, ҡан баҫымы түбән булғанда был эсемлек тәҡдим ителмәй. Шулай уҡ 12 йәшкә тиклемге балаларға ла кишер-сөгөлдөр һутын саманы белеп бирергә кәрәк. Бындай осраҡтарҙа иң яҡшыһы – табип менән кәңәшләшеү.

- Кәримә УСМАНОВА