Коронавирус кәмей, киҙеү арта...

Эпидемиологик миҙгел башланғандан алып Башҡортостанда 265 379 киҫкен респиратор вирус инфекцияһы менән ауырыу осрағы теркәлгән. Сирләү күрһәткесе – 10 мең кешегә 56,3 тәшкил итә, ул бынан алдағы аҙна менән сағыштырғанда 21 процентҡа күберәк. Был хаҡта бөгөн республика Хөкүмәтендәге оператив кәңәшмәлә Башҡортостандың һаулыҡ һаҡлау министры Айрат Рәхмәтуллин хәбәр итте.

Әлеге ваҡытта Башҡортостанға 1 807 760 доза грипҡа ҡаршы вакцина килтерелгән. 1 417 441 кеше (78 процент) киҙеүгә ҡаршы прививка эшләткән.

Коронавирусҡа килгәндә, һуңғы тәүлектә сирҙе 180 кеше йоҡторған. 174 пациент дауаханала ята, 2843 кеше өйөндә дауалана. Рәсәй Хөкүмәтенең координация үҙәге мәғлүмәттәре буйынса, һуңғы айҙа сирҙең кимәле – 60 процентҡа, ете көндә 19 процентҡа кәмегән. Республиканың йоғошло сирҙәр госпиталдәрендә яңы коронавирус инфекцияһынан дауалау өсөн 390 койка әҙерләнгән, буш урындар фонды 30 процент тәшкил итә.

3 237 542 кеше тулыһынса вакцинация үткән, 939 791 кеше (65,9 процент) ревакцинацияланған.

Халыҡҡа профилактик медицина тикшереүе үткәреү дауам итә. Диспансерлаштырыуҙың беренсе этабын 896 615 кеше (пландан 86,9 процент) үткән, 206 739 кеше (89,6 процент) – һөнәри тикшереү үткән һәм 303 722 кеше (85%) өҙлөгөүҙәрҙе иҫкәртеү өсөн тәрән диспансерлаштырыу үткән.

Башҡортостан Хөкүмәте Премьер-министры Андрей Назаров дауаханаларҙан тыш, ниндәй дауалау учреждениеларының коронавирус инфекцияһынан дауаланыу өсөн ябылыуы менән ҡыҙыҡһынды. Айрат Рәхмәтуллин әйтеүенсә, ябыҡ дауалау учреждениелары юҡ. Йәғни госпиталдәр коронавирустан һуң дауаланыу ихтыяжын тулыһынса ҡаплай.

Фото: smartik.ru