Нуриманда ҙур ҡыуаныс

Бөгөн, 2 декабрҙә, Нуриман районы хакимиәте башлығы Вилдан Ситдиҡов Башҡортостандың һаулыҡ һаҡлау министры Айрат Рәхмәтуллин менән бергә Нуриман үҙәк район дауаханаһының ике табибына яңы йорт асҡыстарын тапшырҙы. Торлаҡҡа офтальмолог Юлиә Абдрахманова менән уролог Раил Ҡалмырҙин эйә булды.

Йорттар “Башҡортостан ауыл биләмәләрен комплекслы үҫтереү” дәүләт программаһының “Башҡортостандағы ауыл халҡын арзан һәм уңайлы торлаҡ менән тәьмин итеү өсөн шарттар булдырыу” ярҙамсы программаһы буйынса төҙөлгән. Ике йорт та тулыһынса төҙөкләндерелгән, газ үткәрелгән. Ике торлаҡ йорт төҙөүгә субсидияларҙың дөйөм күләме 7,5 миллион һум тәшкил иткән. Аҡса федераль, республика һәм урындағы бюджет иҫәбенән бүленгән.

–  Дәүләт программалары ярҙамында ауыл белгестәрен торлаҡ менән тәьмин итә алыуыбыҙ ҡыуандыра. Бөгөн дә табиптарыбыҙға бәйле яҡшы үҙгәрештәр бар – яңы торлаҡ, тормошҡа яңы пландар, яңы перспективалар. Ысын күңелдән именлек, бәхет, йылылыҡ һәм ғаилә именлеге теләйбеҙ! – тине Вилдан Ситдиҡов.

Шулай уҡ бөгөн районда капиталь ремонттан һуң Павловка табип амбулаторияһы асылды. Унда һаулыҡ һаҡлау министры Айрат Рәхмәтуллин ҡатнашты.

Амбулаторияға капиталь ремонт “Һаулыҡ һаҡлау” милли проектының “Һаулыҡ һаҡлауҙың беренсел звеноһын яңыртыу” программаһын тормошҡа ашырыу нигеҙендә үткәрелде. Ремонт өсөн 11 миллион һумдан ашыу аҡса бүленгән. Федераль бюджет средстволарынан тыш, Нуриман район дауаханаһынан бер миллион һум һалынған.

Капиталь ремонт барышында көндөҙгө стационарҙың кабинеттары һәм палаталары яңыртылған, электр монтажлау эштәре башҡарылған, кабинеттарҙа иҙәнгә плитка түшәлгән, ишектәр ҡуйылған, бәҙрәф, ванна бүлмәләре йыһазландырылған. Һаулыҡ мөмкинлектәре сикле пациенттар өсөн пандус ҡуйылған. Табип амбулаторияһында барлыҡ медицина учреждениеларын йыһазландырыу стандарттарына тап килә.

– Амбулатория яҡтыраҡ һәм уңайлыраҡ булып китте. Хәҙер медицина хеҙмәткәрҙәре пациенттарҙы уңайлы һәм заманса шарттарҙа ҡабул итәсәк, – тип билдәләне Башҡортостан һаулыҡ һаҡлау министры Айрат Рәхмәтуллин.

Фото: Нуриман районы хакимиәте.