Һәр сабый сәләмәт булһын!

Башҡортостан Хөкүмәтендә Премьер-министр Андрей Назаров рәйеслегендәге кәңәшмәлә киңәйтелгән неонаталь скринингты тәьмин итеү мәсьәләләре ҡаралды.

Киләһе йылдың ғинуарынан ошондай федераль программа ғәмәлгә ашырыла башлай. Был – сабыйҙарҙа нәҫел һәм тыумыштан ауырыуҙар барлығын тикшереүҙәрҙе үткәреү. Бындай иртә тикшереүҙәр ауыр сирҙәрҙе башланғыс стадияларҙа асыҡларға һм балаларға тиҙерәк мотлаҡ ярҙамды күрһәтергә булышлыҡ итәсәк.

- Программаны тормошҡа ашырыу өсөн Рәсәй төбәктәрендә 11 медицина ойошмаһынан торған исемлек билдәләнгән. Беҙҙең Республика медицина-генетика үҙәге Вола буйы федераль округы медицина ойошмалары өсөн тикшереүҙәр үткәрәсәк, - тине Андрей Назаров.

Башҡортостанда тикшереүҙәр өсөн биоматериалдар өлгөләре республиканың балалар табыу йорттарынан ғына түгел, Волга буйы федераль округындағы – Ырымбур, Ульяновск, Һамар, Һарытау өлкәләрендәге, Пермь крайындағы һәм Мари Эл Республикаһындағы 151 бала табыу йортонан да килтереләсәк.

Яңы тыуған сабыйҙы нәҫел сирҙәренә тикшереү әсәйҙең (баланың законлы вәкиленең) үҙенең ирекле ризалығы булғанда үткәреләсәк.

Премьер-министр республиканың Һаулыҡ һаҡлау министрлығына генетика патологияһы асыҡланасаҡ балаларҙы дарыуҙар менән тәьмин итеү механизмын уйларға ҡушты.

- Мотлаҡ дарыу препараттары резервын булдырырға кәрәк. Шулай уҡ барлыҡ балаларға ла мотлаҡ тест үткәреү һәм тикшереүҙәрҙән баш тартыуҙы булдырмау өсөн был федераль программаның маҡсаттары тураһында халыҡҡа мәғлүмәттәр еткереүҙе мотлаҡ ойоштороғоҙ, - тип ҡушты Андрей Назаров.

Фото: detiroom.ru