Бөтә яңылыҡтар
Сәләмәт булайыҡ
3 Апрель 2023, 21:50

Өфө ғалимдары “гәлсәр кешеләр”гә хас гендарҙы тапҡан

Һәр төбәктәге төрлө халыҡ өсөн үҙенсәлекле гендар табылыуы мөмкин.

Өфө ғалимдары “гәлсәр кешеләр”гә хас гендарҙы тапҡан
Өфө ғалимдары “гәлсәр кешеләр”гә хас гендарҙы тапҡан

Өфө фән һәм технологиялар университеты белгестәре һирәк осрай торған сиргә – тамамланмаған остеогенезға – килтергән гендарҙы асыҡланы. Ундай кешеләрҙе, һөйәктәренең мурт булыуы сәбәпле, “гәлсәр кешеләр” тип йөрөтәләр.

Рәсәй Мәғариф һәм фән министрлығының “Приоритет-2030” программаһының (уның сиктәрендә эш алып барыла) матбуғат хеҙмәте хәбәр итеүенсә, был асыш, аныҡ төбәктә йәшәүселәрҙең популяция үҙенсәлектәрен иҫәпкә алып, сирҙең ДНК-диагностикалау алгоритмын эшләргә булышлыҡ итә.

“Генетиканы өйрәнеү өсөн Башҡортостандағы тамамланмаған остеогенезға шик булған 171 пациенттың анализын өйрәндек. Сирҙең барлыҡҡа килеүе һәм үҫеше механизмына 25 ген йәлеп ителгән. Был ДНК-диагностикалауҙы һиҙелерлек ҡатмарлаштыра. Өфө университеты генетиктары, төбәктә йәшәүселәр араһында был ауырыуҙы тикшереп, айырым гендарҙың мутацияһын билдәләне: 68 пациентта дүрт төрлө генда мутация табылды, был мутацияларҙың 98 процентын ғалимдар беренсе тип коллагендағы ике генда тапты”, - тип хәбәр иткән матбуғат хеҙмәте.

Өфө фән һәм технологиялар университетының молекуляр медицина үҙәге директоры Рита Хөсәйенованың әйтеүенсә, диагностикалау алгоритмын киңәйтеү өсөн аныҡ төбәктәге пациенттарҙы өйрәнергә кәрәк. Һәр төбәктәге төрлө халыҡ өсөн үҙенә генә хас гендар табылыуы мөмкин. Был алгоритм булышлығында тамамланмаған остеогенез осраҡтары теркәлгән ғаиләләргә сирле бала тыумауы өсөн медицина-генетика консультациялар үткәреү планлаштырыла.

Фото: Өфө фән һәм технологиялар университеты.

Автор:Айһылыу Низамова
Читайте нас: