43 йыл көн дә мөғжизәгә шаһит ул

“Медицина ойошмаһының иң яҡшы етәксеһе” номинацияһында беренсе урынды Өфө ҡала клиник перинаталь үҙәгенең баш табибы Зөһрә Гурова яуланы.

Зөһрә Ғилмешәриф ҡыҙы Гурованың хеҙмәт стажы – 43 йыл. Ул – Башҡортостандың атҡаҙанған табибы, Рәсәйҙең атҡаҙанған һаулыҡ һаҡлау хеҙмәткәре, республиканың һаулыҡ һаҡлау отличнигы, медицина фәндәре кандидаты.

Хеҙмәт стажын республика балалар дауаханаһында шәфҡәт туташы булып башлаған. 2013 йылда 3-сө балалар табыу йортона баш табип итеп тәғәйенләнгән. 2023 йылдың 1 февраленән был ойошма Өфө ҡала клиник перинаталь үҙәге итеп үҙгәртелгән.  

Акушер-гинеколог – иң изге һөнәр эйәләренең береһе. Ул донъялағы иң төп мөғжизәгә  –  сабый тыуыуына – шаһит була. “Быға күнегеп булмай. Һәр баланың тыуыуы – үҙе мөғжизә. Эшемде яратам һәм беҙҙең балалар табыу йортонда сабый тапҡан ҡатындарҙың бәхетле йөҙҙәрен күрәм, - ти табибә. – Башҡортостандағы барлыҡ ҡатындарға сәләмәтлек, әсәлек бәхете теләйем. Балалары һәр саҡ ҡыуандырып ҡына торһон. Ә беҙ эшләүҙе, камиллашыуҙы, яңы диагностикалау һәм дауалау ысулдарын сафҡа индереүҙе, уңайлы шарттар булдырыуҙы дауам итәсәкбеҙ”.

Фото, сығанаҡ: vk.com/wall-172931669?own=1&z=photo-172931669_457247787%2Falbum-172931669_00%2Frev