Уны элек-электән файҙаланалар

Әлегә йүкә сәскә атмаһа ла, уның шифаһы тураһында тағы бер хәтергә төшөрәйек.

Йүкә сәскәһе матур ғына түгел, шифалы дарыу ҙа. Ул – бактерияларға, елһенеүгә ҡаршы бик яҡшы сара, шулай уҡ тән температураһын төшөрөүгә булышлыҡ итә. Тап ошо сәбәпле уны элек-электән файҙаланғандар. Һалҡын тейгәндә йүкә сәскәһе төнәтмәһе йүткереүҙе баҫа, тын юлдарын таҙалай. Айырыуса йөклө ҡатын-ҡыҙҙарға температура төшөрөү сараһы булараҡ кәңәш ителә. Бынан тыш, ул ауыҙ ҡыуышлығы боҙолғанда тиҙерәк йүнәлтә.

Йүкә сәскәһен ҡәҙимге сәй кеүек төнәтеп, йылы килеш эсергә кәңәш итәләр. Көндәлек норма – ике-өс сынаяҡ. Йүкә сәскәһенән төнәтмәне оҙаҡ ваҡыт эсергә ярамай, хәл яҡшырғас уҡ туҡтатырға кәрәк. Ә ул түбәндәгесә әҙерләнә: бер аш ҡалағы кипкән йүкә сәскәһенә 200 миллилитр ҡайнап торған һыу һалып, 20 минут томалап торғандан һуң эсергә мөмкин, әммә һәр төнәтмәне файҙаланыр алдынан табип менән кәңәшләшергә онотмағыҙ.

Айһылыу НИЗАМОВА