Иртән телефон ҡулланыу хәүефле

АҠШ белгесе Эмили МакДональд йоҡонан уянғас та смартфон һәм башҡа гаджеттарҙы ҡулланмаҫҡа кәңәш итә, сөнки улар мейегә насар йоғонто яһай. Ул заманса технологияларҙың кешегә тәьҫире хаҡында һөйләне.

МакДональд биш төрлө мейе тулҡыны – дельта, тета, альфа, бета һәм гамма булыуын аңлат­ты. Нейробиолог әйтеүенсә, уян­ғас та аҡрын, тигеҙ тета- һәм альфа-тулҡындарҙың әүҙемлеге күҙәтелә.
“Был ваҡытта аңыбыҙ мәғлү­мәт­те еңел үҙләштерә”, – тине белгес.

Телефондан иртә менән һөй­лә­шеү йә яңылыҡтар уҡыу бета-тулҡындарға күсеүҙе тиҙләтеүе мөмкин, ти нейробиолог. Был тул­ҡындар иһә мөһим мәсьә­ләләр сис­кәндә артыҡ иғтибар талап ител­гән эштәр өсөн яуаплы. МакДональд фекеренсә, иртән телефонды ҡулланыу мейе эшмә­кәрлеген көсөргәнешле ритмға көйләй.

“Өҫтәүенә иртәнсәк смартфон ҡулланғанда дофамин бүленә, ә ул иһә социаль селтәрҙәрҙе һәм хәбәрҙәрҙе һәр ваҡыт тикшерергә мәжбүр итә”, – тип билдәләне ул.

Белгес иртәнге сәғәттәрҙе файҙалы ашамлыҡтар әҙерләүгә, яҡшы уйҙарға йүнәлтергә кәңәш бирә. Уның әйтеүенсә, уянғандан һуң 30 – 60 минут үткәс кенә смартфонды ҡулға алырға мөмкин.

Гүзәлиә ЗӘЙНУЛЛИНА