Бәпәй тапҡандан һуң сәс ҡойола

Йөклөлөк йәш әсәйҙең һаулығына ҙур йоғонто яһай. Гормональ фон үҙгәреш кисерә, шулай уҡ бәпәйҙең үҫешенә исраф ителгән ресурс­ты тулыландырыу мөһим. Бәләкәй генә сабыйҙы имеҙеүҙе лә күҙ уңынан ысҡындырырға ярамай. Бар нәмә үҙ яйына ҡайтҡансы, ҡатын-ҡыҙ төрлө проблемаларға тап була. Мәҫәлән, ҡапыл ғына сәс ҡойола башлай. Был осраҡта ни эшләргә?

Гормональ фондың үҙгәреүе бәпес тапҡандан һуң да дауам итә. Организмда эстроген һәм прогестерон, шулай уҡ ҡан күләме кәмей һәм ҡан әйләнешенең тиҙлеге яйлана. Сәс ҡойолоу уның үҫеш циклдарының боҙолған балансы менән бәйле. Бала тапҡандан һуң витаминдар етмәү сәбәпле, сәстәр телоген, йәғни “тыныслыҡ” стадия­һына күсеп, ҡойола башлай.

Сәс ҡойолоу бер йылға тиклем һуҙылырға мөмкин. Уларға ваҡы­тын­да ярҙам итмәгән осраҡта хроник формаға күсеүе лә ихтимал. Был бигерәк тә йәш әсәнең йоҡоһо туйма­ғанда, стрестан ыҙалаған осраҡ­тарында йыш осрай.

Сәстәргә нисек ярҙам итер­гә?

Ғәҙәттә, сәс ҡо­йолғанда медикаментоз терапия кә­рәкмәй – организмды һәм сәс тамыр­ҙарын файҙалы матдә­ләр менән байытыу ҙа етә. Рационда тимер, аҡһым, цинк, витаминдар (бигерәк тә Е һәм С) күләме етерлек булырға тейеш. Шулай уҡ витамин-минераль комплекстарын ҡабул итеү һәм дөрөҫ туҡ­ланыу мөһим.

Сәсте даими рәүештә йыуып, баш тиреһенә массаж яһау ҙа артыҡ булмаҫ. Бының өсөн махсус щетка менән дә ҡулланырға мөм­кин. Ысул сәс фолликулаларына күберәк туҡлыҡлы элементтар ебәрергә булышлыҡ итә.

Әгәр ҙә сәстәр ойошһа, йыу­ған саҡта кондиционер һөрткәндән һуң ипләп кенә тарағыҙ. Дымлы сәс­те тарау тыйыла.

Сәстәрегеҙ оҙон булһа, айына бер тапҡыр остарын ҡырҡырға мөм­кин. Сәстәр еңеләйеү һөҙөмтә­һендә улар һирәгерәк ҡойола башлар.

Гүзәлиә ЗӘЙНУЛЛИНА