Тактика медицинаһы буйынса оҫталыҡ дәрестәре күрһәттеләр

Бөгөн баш ҡалабыҙҙағы Башҡорт дәүләт медицина университетында юғары уҡыу йорто, Өфө медицина колледжы студенттары өсөн тактика медицинаһы буйынса “Хәрби хәрәкәттәр шарттарында беренсе медицина ярҙамын күрһәтеү” тигән исем аҫтында оҫталыҡ дәрестәре үткәрелде. Сарала Башҡортостан Хакимите Башлығы Максим Забелин,  Рәсәй Федераль Йыйылышы Дәүләт Думаһының Һаулыҡ һаҡлау буйынса комитеты рәйесе Бадма Башанкаев, республиканың һаулыҡ һаҡлау министры урынбаҫары Динара Еникеева, “Берҙәм Рәсәй” партияһының төбәк башҡарма комитеты етәксеһе Руслан Насретдинов, ҡасандыр Башҡорт дәүләт медицина университетын тамамлаған, әле Рәсәй Геройы Александр Доставалов исемендәге башҡорт ирекмәндәр батальонының медицина хеҙмәте начальнигы Арыҫлан Мырҙағолов, Башҡорт дәүләт медицина университеты ректоры, Рәсәй Фәндәр академияһы академигы, профессор Валентин Павлов сәләмләү һүҙҙәре менән сығыш яһаны.

– Тактика медицинаһы белеменә эйә булыу һәм уны файҙалана белеү бик мөһим, – тине Максим Васильевич.  – Бөгөнгө оҫталыҡ дәрестәре һәр кем өсөн кәрәк.

Республиканың һаулыҡ һаҡлау министры урынбаҫары Динара Еникеева сығышында бөгөн студенттар аласаҡ белемдең киләсәктә кәрәк буласағы тураһында әйтте. Шулай уҡ “Берҙәм Рәсәй” партияһының төбәк башҡарма комитеты етәксеһе Руслан Насретдинов, Рәсәй Геройы Александр Доставалов исемендәге башҡорт ирекмәндәр батальонының медицина хеҙмсәте начальнигы Арыҫлан Мырҙағолов медицина хеҙмәткәрҙәренең Донбаста йәшәүселәргә ярҙамы һәм башҡалар тураһында һөйләне. “Ялға ҡайтҡан ваҡытта мине был сараға саҡырыуҙары өсөн рәхмәт. 20 йыл элек ошо юғары уҡыу йортонда белем алғайным. Травматолог-ортопед, дөйөм практика табибымын. Медицина буйынса алған белемем махсус хәрби операция ваҡытында кәрәк булыр тип уйланым", –  тип белдерҙе Арыҫлан Фәнил улы.

Башҡорт дәүләт медицина университеты ректоры, академик, профессор Валентин Павлов Бадма Башанкаевтың Рәсәй Дәүләт Думаһының Һаулыҡ һаҡлау буйынса комитеты рәйесе булараҡ закондарға үҙгәрештәр индереү менән бер рәттән, үҙ миҫалы менән күрһәтелгән был технологияларҙың кәрәк икәнлеге тураһында билдәләне.

Оҫталыҡ дәрестәрендә Рәсәй Федераль Йыйылышы Дәүләт Думаһының Һаулыҡ һаҡлау буйынса комитеты рәйесе Бадма Башанкаев менән Рәсәй табиптарының “Донбасс медицинаһы дуҫтары” төркөмө ағзаһы, Өфөләге 21-се ҡала клиник дауаханаһы анестезилогы-реаниматологы Андрей Спиридонов та ҡанашты.  

Табиптар беренсе медицина ярҙамын нисек дөрөҫ күрһәтеү, яранан аҡҡан ҡанды нисек туҡтатыу, турникеттар ҡуйыу һәм яу шарттарында аптечканы файҙаланыу тураһында һөйләп кенә ҡалманы, күрһәтте лә. Тағы тактика аптечкаһы тураһында һүҙ барҙы. Шулай уҡ беренсе медицина ярҙамын күрһәтеү алымдары күрһәтелде. “Турникеттарҙы, жгуттарҙы, гемостатик сараларҙы файҙаланыу кемдеңдер ғүмерен ҡотҡарасаҡ. Аптечканы белеү генә түгел, уның менән дөрөҫ файҙалана белергә кәрәк”, – Бадма Башанкаев.

Ильяс Миңләхмәтов Өфө медицина колледжында белем ала. Киләсәктә ул фельдшер булып эшләргә уйлай. “Бөгөн беренсе медицина ярҙамын күрһәтеүгә шаһит булыу ғына түгел, мохтаж булған “кеше” сифатында ҡатнашыу, йәғни “ғүмерҙе ҡотҡарып ҡалыу” осрағын үҙеңдә тойоу күңелемдә тәрән эҙ ҡалдырҙы. Киләсәктә фельдшер булып эшләйәсәкмен һәм бөгөнгө тәжрибә бик кәрәк буласаҡ”, – ти егет.

Ошо уҡ көндө Рәсәй Федераль Йыйылышы Дәүләт Думаһының Һаулыҡ һаҡлау буйынса комитеты Бадма Башанкаев Башҡорт дәүләт медицина университетының хирургия кафедралары мөдирҙәре һәм уҡытыусылары менән аралашты. Артабан Бадма Николаевич Башҡорт дәүләт медицина университетының Федераль аккредитация үҙәгендә, Клиникаһына, “Патриот” хәрби-патриотик паркына, “Берҙәм Рәсәй” партияһының Башҡортостандағы Йәмәғәтселеккә ярҙам штабына бара. Рәсәй Дәүләт Думаһы комитеты рәйесе тағы Башҡорт дәүләт медицина университеты хирургия кафедралары мөдирҙәре, уҡытыусылары менән осрашып һөйләшә.

Автор фотолары.