"Һәр бәпесте ҡулға алыу үҙе мөғжизә!"

Уға уңыш һәр саҡ юлдаш.  Дүртенсе “Рәсәй лидерҙары” конкурсы суперфиналисы, “Һаулыҡ һаҡлау” трегы еңеүсеһе,  акушер-гинеколог Динар Ғабдрахманов Башҡортостанда үткәрелгән “Иң яҡшы табип” конкурсында йәнә  еңеү яуланы.  Белгесте алда профессиональ ярыштың федераль этабы көтә.

Динар Ғабдрахманов ихлас күңелдән әсәләрҙең һәм тыуасаҡ сабыйҙарҙың сәләмәтлеге өсөн янып-көйә, борсола, тәжрибәһен һәм белемен уларҙың һаулығын нығытыуға бирә. Уның “Аңлы ата-әсәлек мәктәбе” Рәсәйҙең Дәүләт Думаһы эргәһендәге Йәштәр парламентының һаулыҡ һаҡлау буйынса эксперт советы тарафынан хуплау тапты.

 “Иң яҡшы табип-24” исеменә республиканың 89 медицина ойошмаһынан 247 белгес дәғүә итте. Конкурс шарттары буйынса, ярышта ҡатнашыусының хеҙмәт стажы кәм тигәндә ун йыл тәшкил итеүе, ә конкурсҡа тәҡдим иткән ойошмала биш йыл эшләүе мотлаҡ.  Республика клиник перинаталь үҙәге акушер-гинекологы, акушерлыҡ-гинекология стационары мөдире ҡатмарлы йөклөлөк һәм бала табыу  осраҡтарын алып бара, консультация бирә, хәүеф төркөмөндәге пациенттарға медицина ярҙамы күрһәтә.

– Яҡты донъяға тыуған һәр сабыйҙы ҡулға алыу үҙе ҙур мөғжизә һәм әйтеп бөтөрә алмаҫлыҡ шатлыҡ. Яңы күтәренке тойғолар тәүлек әйләнәһенә өҙлөкһөҙ эшләргә көс-дәрт бирә торғандыр, – ти Динар Рөстәм улы.

Фото: Һаулыҡ һаҡлау министрлығының матбуғат хеҙмәте.