50 йәшендә тәүге тапҡыр әсәй булған

50 йәшлек Өфө ҡатаны тәүге тапҡыр әсәй булған. Был бәхетле ваҡиға ошо көндәрҙә Республика клиник перинаталь үҙәгендә теркәлгән. Үҙенең ғәҙәти булмаған пациенты тураһында акушер-гинеколог Станислав Иваха телеграм-каналында һөйләне. Уның әйтеүенсә, ҡатын тәбиғи юл менән бала тапҡан, әсә бер ниндәй ҙә ауырлыҡ кисермәгән. Һөҙөмтәлә донъяға 2,5 килограмм ауырлыҡ малай тыуған.

Гүзәл исемле ҡатындың күптән көткән йөклөлөгө ЭКО һөҙөмтәһендә мөмкин булған һәм ауырлыҡһыҙ үткән. Бала ваҡытында тыуған, ни бары кендеге ике тапҡыр муйыны тирәләй уралған. Тик был ауырлыҡ булдырмаған.

“Әлеге ваҡытта пациент балаһы менән бергә, әсәлек менән ҡыуана һәм өйөнә ҡайтыуын көтә. Ысынбарлыҡта – был героик аҙым. 50 йәштә ауырға ҡалыу һәм бала табыу (күпкә йәшерәк күренһә лә) – ҙур батырлыҡ. Беҙ ҡатынды ысын күңелдән бәпесе тыуыу менән ҡотлайбыҙ. Ғаиләһендә мөхәббәт хөкөм итһен”, – тип яҙа табип.

Станислав Иваха үҙен “ҡартайып бала таптым” йәки “50 йәштә ғүмер бөтә” тип уйлағандарға мөрәжәғәт итә һәм дөрөҫ һығымталар яһарға саҡыра.

“Бала табыуҙа “ҡартайып бала таптым” тигән һүҙ юҡ. Һәр нәмәнең үҙ ваҡыты. Ә табиптарҙың бурысы – һеҙгә был еңел булмаған юлда мөмкин булғанса ярҙам итеү”, – ти ул.

Фото: Телеграм.