Хәтерҙе яҡшыртып була

 Аҡылды үҫтереү һәм хәтерҙе нығытыу өсөн бер нисә күнегеү бар. Уларҙы даими башҡарыу бар кешегә лә файҙаға ғына буласаҡ.

1. Хәтерҙе нығытыу буйынса беренсе кәңәш - йоҡлар алдынан көн дауамында булған хәл-ваҡиғаны иҫкә төшөрөү. Йәкшәмбе бер көндөкөн генә түгел, аҙна буйы булғанды, ай аҙағында - бер айҙыҡын, йыл аҙағында бер йылда булған ваҡиғаларҙы барлау яҡшы һөҙөмтә бирәсәк. Уларҙы яңынан хис-тойғо кисермәй генә, ситтән күҙәтеүсе кеүек күңелдән иҫкә төшөрөргә кәңәш итә белгестәр.
2. Көн дә шахмат уйнау хәтерҙе нығытырға ныҡ ярҙам итә (бигерәк тә күҙҙе йомған килеш, яттан уйнау яҡшы һөҙөмтәле).
3. Шиғыр, доға ятлау, онотмаҫ өсөн уларҙы ҡабатлап тороу ҙа был йәһәттән бик мөһим шөғөл һанала.
4. Тағы ла ошондай күнекмә файҙалы: таныш булмаған урында (бүтән урамдамы, фатирҙамы һ.б.) бер нисә секунд нимә барлығын ҡарап алырға ла, артҡа әйләнеп баҫып, эргәңдәге кешегә уларҙы, төҫөн, урынлашыуын да күрһәтеп, һанарға.
5. Бер, ике, өс йыл элек нәҡ ошо көндә нимә эшләүегеҙҙе иҫегеҙгә төшөрөп ҡарағыҙ. Тәүге осорҙа күҙ алдынан өҙөк-йыртыҡ ваҡиғалар ғына үтер, ә көн дә шулай ҡабатлағанда, хәтер күнегә, яйлап ҡына үткәндәр үҙ тәртибендә иҫкә төшә башлай. Ошондай юл менән мәктәптә алған белемде лә хәтерҙә тергеҙергә мөмкин.

Фото: яһалма интеллект ярҙамында яһалды.